《小傳日記》花旗三大魚缸牛氣沖天咗咁多日，部分缸友都終於忍唔住止賺離場，標普七連
漲止步，噚晚（１６日）微跌２點收２３４７；道指雖然係第六個交易日收市新高，不過都只係
收升７點報２０６１９，明顯已經無乜力。
香江呢邊都差唔多，話晒去到二萬四大關，獲利回吐壓力就一定有，今朝恆指低開２９點後
，中資金融股腳軟軟拖累，大市最多唔見１６３點至２３９４４，雖然ＡＩＡ（０１２９９）夾
高頂住，但都獨力難支。恆指散場唔見７３點收２４０３３；國指就跌多ＤＤ，跣低９４點報
１０３６０。
大市回一回氣，但成交依然唔少，約有８６３億銀。二萬四整固工程進行中，好友加油呀！
＊美股高又危港市有點翳，業績期開始成交不太曳＊
寶哥哥（０００２３）掀起錢莊股業績序幕。隻股舊年純利跌３３巴仙至３７﹒２３億，第
二次中期息減到０﹒２８銀；全日瞓低４巴仙，報３３﹒１銀，仲係最差藍戰士。
聯想（００９９２）放榜之後未好過，今日表現緊隨東亞，被麥格理話業績遜預期，「他屐
」降至７﹒５銀，亦碌低近４巴仙，報４﹒７銀。
美高梅（０２２８２）舊年賺３０﹒３７億跌逾２巴仙，末期息０﹒１６銀；野村話佢依然
係賭業首選，但目標削至１７﹒６銀。美高梅趴低逾３巴仙，報１４﹒１４銀。金沙
（０１９２８）今日內都會放榜，佢之前話過有個「女賭神」出現拖低盈利，完場跣低近２巴仙
，得返３２﹒３銀。
＊大摩來發功點石可成金？恆安與友邦粉絲笑得真＊
恆安（０１０４４）都有「摩笛」唱好，大摩調高評級至「增持」，目標升至８０銀；應聲
飛起逾５巴仙，報６５﹒７銀。
大摩另外又維持友邦（０１２９９）評級「增持」，目標６０銀不變，佢當然唔執輸，跳高
逾３巴仙，收報４９銀。公司下星期五（２４日）就放榜，如果成績省鏡，６０銀真係無難度㗎
！
ＡＳＭ（００５２２）獲摩通喺上星期五（１０日）增持１１３萬股，今日終於重返「紅底
」行列，收穫逾３巴仙，埋單１０１﹒４銀。
＊板塊輪流炒輪到券商股？天安見大手媽媽憑子貴＊
成班中資股輪住炒，當中券商佬就無咩好消息，最多都係早排跟過生發發衝過一次。不過今
日就打咗支強心針。祖國股指期貨鬆綁，交易費下調，自然有機會多咗缸友入市。券商佬阿哥銀
證（０６８８１）曾經逆市跳起３巴仙，點知唔夠半日就碌番晒落去，最終倒跌近２巴仙收
７﹒７４銀，認真無癮，搞到其他街坊都散ｂａｎｄ。反而中信証券（０６０３０）仲企得穩，
收升逾１巴仙報１７﹒１８銀。
天安（０００２８）開市前錄得逾５億銀大手，涉及股數佔股本近７巴仙，每股造５銀，比
噚日收市價高近６巴仙。難怪埋單都跳起近８巴仙收５﹒０８銀。仲帶挈埋阿媽聯合地產
（０００５６）行前逾５巴仙添。
＊ＴＶＢ回吐回購有暗湧？高鑫潤又發急升後停牌＊
ＴＶＢ（００５１１）回購計劃又有新進展。據聞，ＴＶＢ第二大股東出聲反對回購，話計
劃其實係掩蓋咗大股東零溢價收購嘅企圖！仲話回購目的係提高股東回報，咁更好方法，就係將
４２億銀用嚟派特息啦！回購出現潛在隱憂，ＴＶＢ近排炒高咁多，難免跌返近２巴仙收報
３３﹒８銀。
高鑫（０６８０８）做咗孖屐焦點！今朝開市就彈高近３巴仙，之後仲飆升９巴仙去到
８﹒８８銀。原來寶島嗰邊傳嚟好消息，話旗下大賣場大潤發獲得阿里、ＱＱ（００７００）同
蘇寧三大巨頭青睞。暫時就只得阿里話唔回應傳聞，有新消息先再宣布。高鑫抽高逾６巴仙，喺
下半場開波無耐就停賽，報８﹒７銀，唔知係有好消息定係澄清呢？假期愉快！請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式
之申述或訂立任何建議及推薦，讀者務請運用個人獨立思考能力自行作出投資
決定，如因相關建議招致損失，概與《經濟通》、編者及作者無涉。
【你點睇】的士記分制將於周末生效，你認為該制度可否幫助的士提升服務質素？► 立即投票
