《小傳日記》魚缸四連高高收，美圖今日再瘦瘦

　　《小傳日記》等咗咁耐，都仲未等到「侵侵」公布減稅同刺激經濟計劃細節，花旗孖屐擔心
計劃可能畀想像中遲推出，噚晚就頓時失去動力，道指悶跌８點收２０９０５點。
　　既然花旗國未有動靜，香江缸友就睇實Ｄ業績。聽日（２２日）除咗ＱＱ（００７００）要
昅實外，仲有長和系、平保（０２３１８）同中海外（００６８８）。隻隻份量都舉足輕重，缸
友要緊盯《經濟通》報道。睇返個市，恆指今日表現都平平穩穩，高開６３點後穩步上揚，埋單
收升９１點收２４５９３，寫下四連漲兼再創１９個月新高；國指就有６０點進帳收１０６４４
。全日魚缸成交９５２億銀。

＊平保明放榜今天氣勢壯，街坊將派績企定眼光光＊

　　萬眾期待嘅神州保險佬成績表，聽日就由大哥平保打響頭炮。事實上，平保向來係咁多隻股
份入面都最被睇好嘅，皆因佢業務夠多元化，瑞信更預測佢去年嘅新業務價值有四成增長，至
４３５億人仔。業績憧憬下，平保近期走勢都幾生猛，今日都有近２巴仙升幅，報４４﹒２銀。
街坊國壽（０２６２８）及太平（００９６６）則緊接著星期四（２３日）派成績表，兩者今年
以嚟嘅累積升幅都有近兩成，表現相當省鏡。不過今日就比較呆滯，國壽冇升跌，太平跌０﹒２
巴仙，報２５﹒２銀及２０﹒３５銀。人保（０１３３９）同財險（０２３２８）就喺星期五
（２４日）放榜，兩位齊齊腳仔軟，分別跌超過１巴仙及０﹒２巴仙。
　　環球錢莊佬大笨象（００００５）同渣打（０２８８８）則被米字國媒體指，佢哋同埋其他
１７間當地錢莊，喺２０１０至２０１４年間幫俄佬「洗錢」，金額至少有２００億美金。不過
，兩者今日表現都算硬淨，分別升０﹒３巴仙及０﹒６巴仙，報６３﹒７銀及７０﹒５５銀。

＊ＱＱ再破頂ＩＧＧ續飆，高佬來撐場鐵路升到笑＊

　　ＱＱ聽日（２２日）放榜，上半場本來都腳軟，但下半場開始偷步行前０﹒３巴仙，報
２２８﹒８銀，仲再次破頂高見２２９﹒８銀。
　　美圖（０１３５７）噚日坐過山車咁，創上市新高之後又倒插逾１１巴仙，跟住就傳出畀證
監調查。隻股今日早段一度跳高逾７巴仙，但之後又再插過；雖然佢哋話目前未接獲監管機構對
公司嘅調查，但最終都要瞓低近９巴仙，收１４﹒６銀。近日同獲北水追捧嘅ＩＧＧ
（００７９９）就升不停，再飛前近６巴仙，報８﹒３７銀。
　　高盛唱好鐵路佬，話中交建（０１８００）、中鐵（００３９０）同中鐵建（０１１８６）
舊年新訂單增長強勁，幾年內可以轉化收入。三個駛前約２至４巴仙，埋單１１﹒４８、
７﹒４５同１１﹒７８銀。

＊恆安績進步趁消息出貨，巨濤遇伯樂復牌有團火＊

　　恆安（０１０４４）舊年多賺一成至３５﹒９７億人仔，派息１﹒１銀，但似乎缸友唔太收
貨，趴低近７巴仙，報６３﹒０５銀，差絕藍戰士。
　　中電信（００７２８）都喺中午拎成績，上年純利１８０億人仔，跌逾１０巴仙，結果腳軟
１巴仙，得返３﹒７８銀。
　　巨濤海洋（０３３０３）向深Ａ三聚環保同盧春熖，折讓四成配售８億股。佢今日復出缸湖
，一度碌低近１４巴仙，之後拗腰反彈近１８巴仙，收２﹒３５銀。
　　達利食品（０３７９９）開賽前錄得成２﹒３５億銀大手，令佢一舉打入成交榜，但全日只
能夠收穫０﹒４巴仙，報４﹒７１銀。

＊調控縱加碼三四線有利？雅居樂融創你飛我又飛＊
　
　　雖然阿爺幾日前先出辣招為樓市降溫，但同一時間交銀國際出嚟話，樓市調控對三四線城市
有利。主力唔係集中喺一二線城市嘅磚頭佬今日又再坐火箭，雅居樂（０３３８３）今日急升接
近８個巴仙，報７﹒１６銀，創埋５２周新高。
　　二月銷售成績相當靚仔嘅融創中國（０１９１８）表現同樣相當省鏡，急升近８個巴仙，報
９﹒６２銀，創５２周新高。不過，保利置業（００１１９）就腳軟咗四日，儘管今日公布嘅成
績表扭虧為盈，賺８０７４﹒５萬銀，但都要跌超過兩巴仙，報３﹒２８銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。