《小傳日記》ＱＱ力撐再破頂，魚缸牛皮未瞓醒

　　《小傳日記》花旗國上星期初申領失業救濟金人數下跌，費城聯儲嘅製造業指數亦造好，有
強勁嘅經濟數據支持，花旗道指噚晚（１８日）收高５６點。至於香江魚缸經歷三連跌之後，今
朝都跟住外圍高開３５點報２５１７１，可惜即使有ＱＱ（００７００）同神州磚頭佬力撐，魚
缸反彈嘅力水依然有限，最多只能夠升１２９點高見２５２６６，埋單就得３８點落袋，收報
２５１７４。
　　Ａ場滬指繼續冇嚟神氣，升唔夠１點報３０９０；而國貨佬就腳軟３點報１０２６７。
　　魚缸去向未明，加上又到ｈａｐｐｙ　ｆｒｉｄａｙ，成交僅７０１億銀，比噚日少咗近
２４巴仙。
　
＊瑞聲續停賽舜宇變羔羊，科通甚反覆ＩＧＧ上揚＊
　
　　噚日瑞聲（０２０１８）再遭沽空機構葛咸城研究狙擊，引發科網股小型股災，ＩＧＧ
（００７９９）今日嚟個大反擊，跳高近５巴仙，報１１﹒６銀。噚日瀉走６巴仙嘅科通芯城
（００４００）宣布重啟股份回購計劃，又獲富瑞重申「買入」評級，今朝一度飛起近４巴仙，
之後又曾倒跌近８巴仙，最尾就打個和冇升跌，報１０銀。
　　大阿哥ＱＱ績後持續強勢，有大行星展唯高達唱好睇到上３３６銀，結果衝前近２巴仙，報
２６８﹒４銀，仲曾經破頂高見２７１﹒２銀。
　　瑞聲停賽，街坊舜宇（０２３８２）繼續成為「代罪羔羊」，今日再瞓低近４巴仙，報
５９﹒８銀。
　
＊首採可燃冰阿爺真叻叻，油服齊炒起寧舍多人錫＊
　
　　神州成功喺深海開採出可燃冰，並能夠持續轉化成天然氣，成為世界第一！之後仲打算喺
２０３０年前進行商業開發。一眾油服佬即刻大炒概念，ＴＳＣ集團（００２０６）、中石化油
服（０１０３３）齊齊飆起近６同近９巴仙，報０﹒７５同１﹒３８銀。中海油服
（０２８８３）唔執輸，企高近４巴仙，收７﹒０８銀。最誇張就莫過於巨濤海洋
（０３３０３），火箭式飛前近１３巴仙，收２﹒９７銀。
　　港鐵（０００６６）噚日創歷史新高，但今日末期息８２仙連同特別息２﹒２銀除淨，缸友
收割完調頭就走，港鐵最終碌返低近４巴仙，埋單４４﹒８５銀。
　
＊港鐵今除淨好息徒掟貨，鬥快上山頂內房有團火＊
　
　　神州磚頭佬今日全線跑出，做慣頭馬嘅恆大（０３３３３）同ＢＩＧ桂園（０２００７）最
巴閉，恆大今日除咗獲標普調高評級外，仲收到風話回歸Ａ場有進展，股價又破頂，最多爆升超
過１２巴仙，去到９﹒７７銀山頂位插旗，埋單升咗９巴仙，報９﹒４８銀。
　　ＢＩＧ桂園下周二（２３日）除淨，今年派息豪爽咗，末期息１０﹒２分人仔，舊年同期派
６﹒４７分，難怪股價承勢炒高到８﹒３８銀，創九年半新高，埋單升咗６巴仙，報８﹒２銀。
　　合景泰富（０１８１３）之前被標普降評級，話投地進取令槓桿水平偏高，但係今日都照彈
高咗逾３巴仙，報５﹒６銀。融創（０１９１８）今日都好標青，升咗近６巴仙，報１１﹒１銀
。
　
＊股仔炒消息弘海漲九成，交國新登場慢行微微升＊
　
　　阿里健康（００２４１）話要大嗱嗱攞成３８億銀同阿媽阿里巴巴買保健食品業務，彈高逾
１１巴仙，報３﹒７９銀。
　　鷹力投資（００９０１）話諗住揼錢出嚟投資陝西一間電商，朝早最多升咗成倍，但收尾只
係升近３３巴仙，報０﹒３０５銀。
　　有傳神州嚟緊諗住會限制煤炭進口，細細粒嘅弘海（０００６５）就坐火箭升高最多九成半
，魚缸收工前都仲未肯落，埋單有近８８巴仙升幅，報０﹒３８５銀。但神華（０１０８８）等
其他大阿哥就無咩反應。
　　交銀國際（０３３２９）今日第一日出ｓｈｏｗ，但表現呆呆滯滯，收２﹒７２銀，只係較
招股價２﹒６８銀高１巴仙多Ｄ。假期愉快，請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。