《小傳日記》花旗國魚缸噚晚（２７日）全線瞓低，皆因參議院推遲醫改議案投票，孖屐再
次質疑侵侵嘅計劃可唔可兌現。道指收低９８點報２１３１０，標普更跌近１巴仙收２４１９點
，係６星期以嚟最大跌幅。
外圍魚缸企唔穩，香江魚缸今朝（２８日）跟住低開１０４點，再加上細價股風暴仲未完，
股王ＱＱ（００７００）又腳軟碌低近２巴仙，最終魚缸埋單唔見１５６點報２５６８３，又再
同十天線（約２５７３９點）及廿天線（約２５８２５點）說再見；國指跟住瞓低８９點報
１０４０８。
魚缸人心惶惶，缸友都唔敢亂出手，全日成交約７７０億銀。
不過溫馨提示，國家主席習大大聽日（２９日）訪港，話唔定可以幫魚缸沖沖喜呢！
＊細股續洗倉聯旺心慌慌，Ｗｅｂｂ哥開口中皓文好沉重＊
噚日細價股風暴仲未完結，「股壇長毛」Ｄａｖｉｄ Ｗｅｂｂ早前提過嗰５０隻魚毛仔今
日大部分繼續無運行。雖然翠如ＢＢ隻聯旺（０８２１７）一朝早彈高近九成，但好快又再表演
跳水，全日趴低１６巴仙，報０﹒８９銀。中國投融資（０１２２６）同皓文（０８０１９）就
比較慘，分別蒸發４６巴仙同近５６巴仙，各報６﹒７仙同５﹒２仙。其他魚毛仔普遍都急瀉兩
、三成。
今日除咗細價股大上大落，比亞迪電子（００２８５）都坐過山車咁，今朝開市無耐一度急
瀉２２巴仙，之後跌幅先慢慢收窄番，最終仍然跪低一成，收報１６﹒０８銀。
＊納指腳軟軟ＱＱ亦疲倦，手機股向下舜宇受驚嚇＊
谷歌畀歐盟反壟斷當局破紀錄罰款２７億美金，嚇到花旗國科技股噚晚腳軟軟。呢邊廂，
ＱＱ（００７００）噚日創完歷史新高２８８﹒４銀之後，今日亦有啲高處不勝寒，碌低近２巴
仙，報２８２﹒８銀。
手機設備佬都冇好日子過，舜宇光學（０２３８２）瞓低近５巴仙，收６９﹒１銀。通達
（００６９８）、高偉電子（０１４１５）就趴低２同３巴仙，報２﹒３８銀同３﹒１銀。瑞聲
（０２０１８）唔好得幾多，唔見咗近２巴仙，得返９７﹒４銀。
＊侵侵收關稅鋼鐵未恐懼，超人保不失大象都好得＊
有傳「侵侵」開始冇咩耐性，可能會對中國採取貿易行動，包括對鋼鐵進口加徵關稅。但一
眾鋼鐵佬一於少理，鞍鋼（００３４７）、西王特鋼（０１２６６）衝前約５巴仙，分別報
５﹒５９同１﹒１４銀。馬鋼（００３２３）先排獲中信建設重申「買貨」評級，表現更誇張，
飛起逾７巴仙，報３﹒０５銀。
孖屐今日跌到一仆一碌，但有幾隻藍戰士大隻佬力保不失，超人一號（００００１）、大象
（００００５）齊齊企高唔夠１巴仙，埋單９８﹒８５銀同６８﹒５銀。
＊ＡＳＭ瞓低中建築發威，大摩叫掃貨萬洲笑呵呵＊
ＡＳＭ太平洋（００５２２）噚日畀大行唱淡大跌，雖然有另一間行ＢＥＲＥＮＢＥＲＧ護
航，升目標價到１０５銀，維持「持有」評級，但都阻止唔到跌勢，ＡＳＭ今日一度跌到落
１０５﹒５銀，以近全日低位１０６銀埋單唔見近５巴仙。
神州建築國際（０３３１１）就好彩得多，有大和撐腰升目標價到１６﹒５銀，唱好「掃貨
」評級，全日升近４巴仙收１３﹒１６銀，三日累計升逾６巴仙，認真威水！
萬洲（００２８８）獲大摩唱好目標價由７﹒９銀升至９銀，叫繼續缸友「掃貨」，消息令
全日逆市升逾１巴仙，最終以破頂價７﹒８銀埋單。請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式
之申述或訂立任何建議及推薦，讀者務請運用個人獨立思考能力自行作出投資
決定，如因相關建議招致損失，概與《經濟通》、編者及作者無涉。
全新節目《說說心理話》青少年不可以戀愛！？真實個案講述驚心動魄經歷► 即睇
