《小傳日記》花旗魚缸上星期五晚（２１日）有Ｄ腳仔軟，皆因巨挈成績唔係太省鏡，道指
跣低３１點收２１５８０，納指亦高處不勝寒，雖然只係下挫２點收６３８７點，但都要為十連
升畫上句號。
外圍唞一唞，香江呢，放假先至嚟打風。八號風球噚日（２３日）歷時只有４粒鐘，
「洛克」來去匆匆。今日（２４日）天朗氣清熱到爆，恆指象徵式高開１３點後，ＱＱ
（００７００）、吉利（００１７５）、長建（０１０３８）又發力，大市最高跳起１７５點至
２６８８２，收升１４０點進帳報２６８４６；國指就輕輕跳起３３點報１０８２０。
雖然今日完場後Ｕ盤進入第二階段，新增恆生綜合小型股指數股過百隻，但對魚缸成交就無
太大刺激，比上星期五（２１日）仲少咗７巴仙，約有７９１億銀左右。
＊Ｕ盤次階段成交卻減少，車仔兩邊走長汽唔識笑＊
砵砵車向左走向右走，吉利上周五後退近半成後，今日向前衝番近６巴仙，報１８﹒６２銀
，收復失地有凸，做埋今日最威藍戰士；街坊華晨（０１１１４）仲威，獲大摩畀佢「增持」評
級，目標價關更加由１７蚊升到３０蚊，全力開ｔｕｒｂｏ飛前超過８巴仙，報１８﹒２銀。
另一方面，長汽（０２３３３）被中金大削四成目標價去到得返８﹒５銀，今朝開市曾經唔
見７巴仙，但瑞信話佢最壞時間已經過去，重申「優於大市」評級，長汽全日打個和無升跌，報
１０﹒０４銀。
＊電能與長建你好我也好，美銀來唱好ＱＱ即跳高＊
超人系嘅長建同埋電能（００００６）上個星期四（２０日）收市放榜後，大行紛紛讚好。
大和最新升長建目標價，由７２﹒３銀升到８０﹒２銀，評級亦由「優於大市」升到去「買貨」
，因為睇好米字國業務同埋袋鼠國ＤＵＥＴ收入勁過預期，加上電能（００００６）派特別息之
後長建又可以有多１００億「濕平」，長建就咁跳高近４巴仙，收報７２﹒２５銀；電能都唔輸
蝕，有近３巴仙進帳，收報７７﹒３５銀。
股王ＱＱ就有美銀美林唱好，睇好佢手遊收入，將目標價由２９９蚊升到３３１蚊，重申
「買貨」評級，最終彈起近２巴仙。輕易上越三紅底，收報３０２﹒２銀，高見３０２﹒８破頂
！
＊舜宇好氣勢瑞聲繼續曳，中興兩年高邊個夠我揮＊
神州手機鏡頭一哥大佬舜宇（０２３８２）喺上周發盈喜話上半年超碼賺多１﹒２倍，股價
當堂坐咗火箭，上個禮拜頭三日已經升咗近３３巴仙，最高去到９９﹒７５銀，離變身「紅底股
」僅一步之遙。雖然跟住回回氣，但成個星期計都升咗１６蚊或超過２１巴仙，勁！今朝開市隻
股仲食住個勢，最多彈高咗近６巴仙，可惜又係唔夠力，埋單只係升咗近２巴仙，報９２﹒３５
銀。街坊瑞聲（０２０１８）繼上周五高台跳水插咗近１２巴仙後，今日亦繼續潛水，跌咗近４
巴仙，５０隻藍戰士入面跑包尾，報１０５蚊。
神州電訊設備一哥中興通訊（００７６３）喺上個禮拜都有發盈喜，而今日呢位一哥就會話
佢有多項５Ｇ技術攞到突破！今日最多彈高到兩年新高，高見２１﹒１銀，埋單就升咗超過２巴
仙，報２０﹒７５銀。
＊融創與海控齊齊上山頂，惠譽踩一踩富力驚一驚＊
最近多多動作嘅融創（０１９１８），老細喺微博話會昅實公司現金流，叫大家唔使過度擔
心，缸友聽到之後好收貨，融創最多爆升超過８巴仙，喺最新嘅山頂位２１﹒４銀插旗，但全日
只係升咗近２巴仙，報２０﹒１銀。
富力地產（０２７７７）喺上個星期話要用２００億人仔向萬達買起７２間酒店，本來缸友
都好受落，公布呢單大刁之後都升咗近７巴仙，但今日就被惠譽唱淡，話嗰大刁會增加富力嘅總
債務水平，將富力列入負面觀察，搞到富力今日最多跌咗近４巴仙，埋單表現叫做好啲啲，但仍
跌咗超過１巴仙報１３﹒４４銀。
中遠海控（０１９１９）喺上個星期話佢媽咪正籌劃緊重大事項，最新消息就話正積極準備
回復工作，缸友可能憧憬會有注資計劃，即刻入定貨部署，全日最多升咗近１３巴仙，喺近兩年
高位４﹒８８銀插旗，收工前都升咗超過１２巴仙，報４﹒８５銀。
中國電力（０２３８０）話預計上半年大嗱嗱賺少起碼七成，雖然只係跣近半成，報
２﹒６６銀，但係就跌穿晒所有平均線。請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式
之申述或訂立任何建議及推薦，讀者務請運用個人獨立思考能力自行作出投資
決定，如因相關建議招致損失，概與《經濟通》、編者及作者無涉。
【你點睇】的士記分制將於周末生效，你認為該制度可否幫助的士提升服務質素？► 立即投票
