《小傳日記》花旗國「揸ＦＩＴ人」侵侵一向都「語不驚人誓不休」，噚晚（１７日）就傳
出，佢嘅得力助手科恩因不滿佢講咗Ｄ有關種族暴力事件言論打算劈炮唔撈。消息一出，缸友驚
侵侵嘅重要經濟改革可能有阻滯，道指當堂大地震；雖然白宮已經澄清傳聞，但係道指都要急插
２７４點收２１７５０點。
香江亦受到波及，今朝（１８日）恆指裂口低開３４４點失守兩萬七，最低見２６９５１點
。其後，平保（０２３１８）又發力帶動魚缸氣氛，大市一度只係跌１７點；只可惜好友反擊失
敗，最終恆指都係要收挫２９６點或１巴仙，報２７０４７，又跌穿２０天線（約２７３０９）
；國指就唔見１０７點或１巴仙，收市報１０６９３。內銀股沽壓沉重，工、中及建行跌約２％
。
魚缸繼續陷入整固階段，無咩信心嘅缸友都沽貨走人，全日成交都有８４５億銀。
＊跌穿廿天線好友唔敢掂，內銀沽壓重劇飛兜返轉＊
平保半年多賺近７巴仙去到４３４億人仔，多間大行都出嚟唱好，當中摩通繼續維持１００
銀目標價，紅底光環在望！結果佢逆風衝前超過１巴仙，報６０﹒２銀，仲試過高見６１﹒３銀
創新高，係今日第二叻藍戰士！
電能（００００６）中期息連特息夾埋７﹒６２銀今日除淨，缸友見有份袋息之後都決定走
人，電能碌低近３巴仙，報６８銀。
聯想集團（００９９２）意外地首季由盈轉虧７２２９萬美金，成績差過預期，梗係瞓低３
巴仙，報４﹒５６銀，藍戰士中最渣係佢。劇飛（００２９３）中期蝕廿億，但都繼續獲大行唱
好，高盛同瑞信都升目標價，而且上月連同港龍載客量升１﹒５個巴仙，劇飛全日飛起近２巴仙
，報 １２銀，係最叻藍戰士。
＊電能今除淨好息徒拜拜，聯想盈轉虧粉絲掟得快＊
早前恆指公司話會將紅籌同埋民企納入國貨佬指數，但今次季檢國貨佬陣容都係無變動。雖
然係咁，匯證繼續放眼未來，列出１５隻日後有機會做國指嘅名單。畢竟截至上年底追蹤國指嘅
基金有７７億美金咁多，祖國移動（００９４１）低開後慢慢見支持，曾經倒升近１巴仙；但貴
為大隻佬最終都係不敵慘淡嘅大市氣氛，腳軟唔夠半個巴仙，報８６﹒４銀。股王ＱＱ
（００７００）亦榜上有名，無奈隨市腳軟１巴仙，報３２５﹒８銀。
其他有機會加入嘅魚毛，好似粵海投資（００２７０）就有近１巴仙進帳，收報１１﹒２銀
；石藥（０１０９３）亦爬高半個巴仙左右，報１２﹒３２銀；新奧能源（０２６８８）都唔輸
蝕，跳高近１巴仙，埋單５１﹒９銀。
＊匯證的名單粵投攞個讚，６３２創建缸邊炒一番＊
東方明珠石油（００６３２）之前人事大震盪，劉炬辭任主席，上星期二（８日）被免職嘅
樊麗真回朝重新擔任主席。東方明珠今日突然落鑊，炒起近３４巴仙，報０﹒１９銀，仲係最叻
魚仔添。創建集團（０１６０９）就排升幅榜第三，斬穫近２５巴仙，收０﹒６６銀。
民生教育（０１５６９）早日成功加入恆生「港股通」指數嘅大家庭，噚日彈高逾２２巴仙
後，今日再接再厲，跳高近５巴仙報１﹒３３銀。一眾搞教育嘅街坊都叨光，睿見
（０６０６８）、宇華教育（０６１６９）踢高近２同逾２巴仙，報２﹒９同２﹒８２銀。
＊教育有錢途民生連日升，４５１盈喜今天特別醒＊
華邦金融（０３６３８）錄到４手大手，大嗱嗱成１﹒２９億銀，涉及２﹒６８億股，相當
於約７巴仙股權，佢全日跑前４巴仙，報０﹒５２銀，唔知有咩「景轟」呢？
雲鋒金融（００３７６）斥巨資７８﹒６億銀，收購花旗國萬通保險亞洲六成權益，當中
５２億會發行８億股支付。雲鋒金融仲會同螞蟻金服以及賣方母企合作，提供金融服務平台去經
銷資產管理產品。雲鋒金融曾經飆高近３１巴仙，但埋單只收穫逾５巴仙，報６﹒６２銀。
協鑫新能源（００４５１）發盈喜，估計中期持續經營業務多賺逾兩倍，應聲飛起近兩成，
收報０﹒４３５銀。假期愉快，請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式
之申述或訂立任何建議及推薦，讀者務請運用個人獨立思考能力自行作出投資
決定，如因相關建議招致損失，概與《經濟通》、編者及作者無涉。
全新節目《說說心理話》青少年不可以戀愛！？真實個案講述驚心動魄經歷► 即睇
