《小傳日記》內房拍住生發發，魚缸重返兩萬八

　　《小傳日記》上周五（１５日）花旗國魚缸表現唔錯，又創收市新高，標指仲升破兩千五關
口添！香江魚缸呢邊都開香檳慶祝，今朝跟外圍高開１６３點之後，大市愈升愈有，全靠內房同
埋大隻佬生發發（００３８８）等發力，助恆指創近２８個月高位，以接近全日高位收市，升
３５２點，收報２８１５９點，成功收復兩萬八重要心理關口。勁！
　　Ａ場表現亦唔錯，高收９點，報３３６２點；國貨佬就行前１２８點，收報１１１９５點。
全日主板成交繼續破千億，高達近１１２０億銀；雖說少過上周五近半成，但查實上周五係富時
指數執位所以成交先特別多，今日交投都已經好旺！
　　個市旺咗，大隻佬生發發（００３８８）表現都相當醒神，全日衝前逾４巴仙，埋單
２１８﹒２銀。

＊內房績牛氣潤地最歡喜，成交千一億生發發跳起＊

　　內房繼續牛氣，潤地（０１１０９）係今日叻叻藍戰士，升咗近８巴仙，報２７﹒１銀，仲
試過高見２７﹒３５銀創咗超過兩年新高，但差少少就上到去山頂位２７﹒４１２銀。中海外
（００６８８）升咗近半成，報２９﹒２銀，全日最高去到２９﹒４５銀，創超過兩年新高。四
條三恆大（０３３３３）畀缸友係咁掃貨，成交有成２５億，全日升咗近４巴仙，報２７﹒７５
銀，仲要破埋頂，高見２８﹒６５銀。
　　本地薑都唔執輸，恆地（０００１２）畀瑞銀唱好，將目標價大嗱嗱提高咗６８巴仙至
６２﹒５５銀，都唔知係因為以前睇得太保守，定而家睇得太進取？但也全日就升咗超過２巴仙
，報５５﹒３銀，仲順便喺５５﹒９５銀山頂位插旗。新世界（０００１７）今個星期四
（２１日）放榜，今日偷步升超過兩巴仙，報１１﹒４６銀，試過見超過四年高位１１﹒６銀。

＊瑞銀升他屐四叔我錫錫，新世界抽高預祝考得叻＊

　　大摩預料有更多機構投資者入Ａ場，事緣係因為神州個邊放寬對指數期貨嘅監管，將會刺激
日均成交，因此令到一班中資券商佬全日都生氣勃勃。中信証券（０６０３０）仲獲大摩畀「他
屐」１８﹒４８銀，同埋「增持」評級，結果全日吹起近９巴仙，報１８﹒３銀；另外，街坊銀
證（０６８８１）都同樣獲大摩予「增持」評級，「他屐」就畀８﹒２６銀，全日都飛起咗近６
巴仙，報７﹒２３銀；華泰六八八六（０６８８６）都唔輸蝕，收市都有逾５巴仙落袋，報１８
銀。　
　　
＊大摩讚Ａ場券商急急漲，酒店自有價怡東多人搶＊

　　文華東方國際早前標售怡東酒店，有傳最高出價出到２７０億銀，假如成事嘅話，將會係歷
嚟最大手嘅物業成交。當中呼聲最高嘅就係新地（０００１６），但隻股反而逆市下跌近半個巴
仙，報１３４﹒６銀。其他有份入標嘅仲包括全日跳起近半個巴仙嘅希慎興業（０００１４），
收報３８﹒１５銀；華置（００１２７）衝前近３巴仙，報１３﹒５６銀。
　　除咗怡東酒店受歡迎之外，其他酒店佬都好多人Ｌｉｋｅ架！大和第一次就俾咗個「買貨」
評級香格里拉（０００６９），令佢跳起近９巴仙報１４﹒９銀！街坊泛海酒店（００２９２）
都好厲害，飛起近６巴仙，報０﹒５４銀。大酒店（０００４５）踢起４巴仙，報１３﹒９６銀
。

＊復星走出去粉絲起勢追，汽車再踩油迪迪型英帥＊

　　「上海和黃」復星（００６５６）傳會收購估值５６億銀嘅瑞士皮具品牌Ｂａｌｌｙ，缸友
聽到都好興奮，今日衝前近１２巴仙，報１６﹒７６銀；阿仔復星醫藥（０２１９６）早前打算
將收購印度醫藥企業Ｇｌａｎｄ　Ｐｈａｒｍａ，但創始人想揸番住多Ｄ股權，所以復星醫藥買
到嘅股權降至７４巴仙，復星醫藥跟住阿媽行前２巴仙，報３１﹒４５銀。另外，復星醫藥拆出
嚟嘅ＳＩＳＲＡＭ（０１６９６）超購１６倍半，聽日將會上市，缸友記得留意。
　　砵砵車今日都開ｔｕｒｂｏ，吉利（００１７５）獲招商證券重申「買貨」評級，一支箭咁
衝前近８巴仙，報２２﹒３５銀；比亞迪（０１２１１）都有超過９巴仙進帳，埋單６１﹒７５
銀，係最叻國貨佬。
　　雖然今日魚缸風生水起，但都有魚仔唔生性，今日最渣係華普（０８１６５），由於業務業
務唔夠大，被聯交所著手取消上市地位，全日趴低近３７巴仙，收報０﹒０２６銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。