《小傳日記》今晚香江時間凌晨２點鐘，耶倫姨姨就會宣布議息結果，基本上缸友都預咗唔
會加息，大家真正關心嘅，都係有關縮表消息，如果規模一如預期，相信對當地魚缸都唔會有太
大震盪。講起「震盪」，缸外墨西哥就真係發生７﹒１級大地震，造成二百幾人死亡，又一場天
災慘劇，小傳睇到心都悒埋，願死難者能早日安息。
講番缸內世界先，香江好友今日（２０日）出力守住二萬八大關，大隻藍戰穩穩陣陣，無受
突襲。比亞迪（０１２１１）喺摩通祝福晉升「紅底股」下，全日威盡全場，搶晒風頭，其他砵
砵車股都踩油衝線。
總結全日賽果，恆指收升７６點報２８１２７；國指踢高４７報１１１７３。全日成交
９７０億銀左右。
＊細摩笛一吹比迪全力衝，吉利唔執輸東風急追風＊
今日砵砵車繼續Ｔｕｒｂｏ，細摩摩笛一吹，比亞迪全力衝前，細摩將目標價由７０蚊升到
１００蚊，重申「買貨」評級，比亞迪隨即急升近１３巴仙，收報６８﹒９銀，係今日最威國貨
佬，仲試過見７１﹒９５銀創近７年半高位添！
另外，有傳內地最快出年取消自貿區外資對電動車業務持股嘅限制，外企可以獨資建立電動
車業務，雖然可能會有新嘅競爭，但競爭可以帶來進步同埋新構思，另一國貨佬東風
（００４８９）緊追比亞迪車尾，亦有近半成進帳報１０﹒５６銀。藍戰士吉利（００１７５）
亦都唔執輸，跑前近６巴仙，收報２４銀，係藍戰士中最叻。
＊賣車佬生猛正通命水好，手機佬反彈丘鈦洗頹風＊
賣車佬表現亦好生猛，正通汽車（０１７２８）抽高逾１１巴仙，報９﹒４銀，仲試過上到
９﹒６３銀創近６年高位！街坊中升（００８８１）亦都好威水，中金大升佢目標價三成，由
２３蚊升到去３０蚊，重申「買貨」評級，結果飛起超過７巴仙，收報１８﹒６２銀，亦曾見近
６年高位１８﹒９６銀。
手機佬丘鈦科技（０１４７８）連跌３日唔見超過１１巴仙之後今日一洗頹風，彈番起超過
１１巴仙，報１４﹒５６銀。半導體佬中芯（００９８１）亦衝前近４巴仙，報８﹒９１銀；晶
門科技（０２８７８）就更加有近６巴仙升幅，報０﹒３７５銀。
＊４Ｇ用戶增聯通確勁抽，小賭王增持新濠贏到笑＊
聯通（００７６２）公布８月４Ｇ用戶按月增加咗近１７巴仙，而移動出帳用戶仲累計有成
２﹒７３億戶，認真勁抽！帶動聯通今日跳起近４巴仙，報１１﹒４４銀，係第二好表現藍戰士
。
有消息話華融（０２７９９）內部文件話要暫緩同融創（０１９１８）未簽約嘅項目，雖然
其後融創就出聲明話無啲咁嘅事，仲話雙方溝通良好無問題喎，但消息令融創瞓低近３巴仙，報
３６﹒５５銀。華融都微微跳起近０﹒３巴仙，報３﹒６４銀。
新濠（００２００）主席「小賭王」何猷龍上星期增持咗２２５萬股，為大家打咗支特效強
心針！今日飛起近１４巴仙，報２２﹒５５銀，以全日高位收市，創２０１４年８月以嚟新高！
＊獲阿媽注資中航工飛天，銀紙係咁數玖紙獲唱好＊
中航工業（００２３２）今日真係升到停唔到，獲阿媽中航國際注入花旗國通用航機分銷業
務嘅消息，將佢推高８０巴仙，最勁曾經踢高過見０﹒６９銀，最終報０﹒６６銀，係是日最厲
害嘅股仔！仲帶挈埋旗下幸福控股（００２６０）飛起１８巴仙收０﹒１２９銀添！
街坊都跟住齊齊衝上雲霄，航天萬源（０１１８５）衝前近１７巴仙，報０﹒５６銀；航天
控股（０００３１）都飛起咗近９巴仙，報１﹒０１銀。
部分金屬資源佬跑出，洛陽鉬業（０３９９３）擁有全球第二大鈷銅礦，受惠於阿爺之前話
要用新能源車取代傳統車嘅政策，彈高近６巴仙，報５﹒１３銀。街坊祖國鋁業（０２６００）
仲勁，跳起９巴仙報７﹒２４銀。
玖紙（０２６８９）就有瑞銀繼續唱好，將目標價由１３﹒３７銀升到１９﹒０７銀，仲維
持「買入」評級，唔怪得放榜前夕獲捧高近７巴仙，收報１６﹒１６銀啦。請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式
之申述或訂立任何建議及推薦，讀者務請運用個人獨立思考能力自行作出投資
決定，如因相關建議招致損失，概與《經濟通》、編者及作者無涉。
etnet榮獲HKEX Awards 2023 「最佳表現證券數據供應商」大獎► 了解詳情
