《小傳日記》花旗聯儲局議息塵埃落定，正當缸友以為可以整裝待發，等魚缸整固完成再出
擊之際，標普噚日（２１日）收市之後，突然出手下調祖國主權評級至「Ａ＋╱Ａ－１」，而評
級展望為「穩定」，嚇到香江魚缸腳仔軟，恆指今朝（２２日）開市碌低１６０點報２７９４９
。
標普咁「惹火」，阿爺亦迅速還擊，話標普係做錯決定，Ａ場都算企得穩，收市３３５２。
標普今日向埋香江出招，宣布將香江評級從「ＡＡＡ」下調至「ＡＡ＋」，展望則由「負面」調
至「穩定」，搞到恆指跌幅進一步擴至２６４點至２７８４５，慘！
原本以為可以過一個Ｈａｐｐｙ Ｆｒｉｄａｙ，點知被標普突襲，全日有逾千隻魚毛「舉
白旗」。恆指埋單唔見２２９點報２７８８０；國指就瞓低８９點報１１１０９。魚缸總成交約
有９２６億銀左右。
＊標普好惹火阿爺即還拖，魚缸急急回造淡不造多＊
地產佬今日繼續腳軟，無計啦，大市成個氣氛都唔太掂。不過當中就有一位成功脫穎而出喎
，就係新世界（０００１７）！雖然噚日放榜成績未達預期，搞到最多跣低過４巴仙；好彩今日
有大行畀「ｌｉｋｅ」，順利收復失地，彈起近２巴仙，收報１１﹒２２銀，成為最好表現藍戰
士！可惜街坊們就差Ｄ，新地（０００１６）跟市軟逾１巴仙，報１３０﹒４銀；長實
（０１１１３）瞓低逾１巴仙，報６４﹒８銀。
標普噚日收市後，話神州信貸增加令金融風險上升，將神州長短期主權評級由「ＡＡ－╱
Ａ－１＋」降到去「Ａ＋╱Ａ－１」，同時將喺神州嘅外資銀行評級，同埋將香江長期發行人信
貸評級都降低埋，搞到內銀齊齊瞓低哂。農行（０１２８８）跣低近１巴仙，報３﹒５３銀；建
行（００９３９）、中行（０３９８８）齊齊瞓低近１巴仙。不過，招行（０３９６８）就成功
避過一劫，逆市跳起逾１巴仙，報２８﹒４銀；香江呢邊嘅大象（００００５）都企唔穩，只係
微微唔見０﹒６巴仙收７６﹒２銀。
＊大行畀個讚新世界威威，造紙遇跌市仍然好好揮＊
紙業佬今個月成為風頭躉，單一隻陽光紙業（０２００２）喺９月最多曾經飛起過七成，而
紙業大佬玖紙（０２６８９）噚晚派成績表話全年賺多咗近三倍，雖然今朝有Ｄ腳軟，但下半場
發力，最終倒升返逾３巴仙收１６﹒４銀，勁！理紙（０２３１４）就有大摩唱好，收市踢起逾
２巴仙收１０﹒４４銀。
自從Ａ場三千四闖關不成後，喺３３９１點高位碌落嚟，碌到今日都仲未停，不過一班券商
早前就開始靜雞雞爬升，今日見返少少回吐。華泰六八八六（０６８８６）喺噚日高見
１８﹒９８銀兼創咗近兩年高，今日就腳軟近２巴仙收１８﹒２８銀；中信證券（０６０３０）
一樣唔見近２巴仙，報１８﹒０８銀；銀河證券（０６８８１）都走唔甩，跣低近兩巴仙。
＊澄清無批盪龍光卻受傷，砵砵入後波佳兆業爆上＊
砵砵車開倒車喇！比亞迪（０１２１１）主席王傳福噚日（２１日）話，神州將會普及電動
車，而比亞迪即將同唔同嘅公司，就電池業務進行合作洽商；不過，噚日股價應聲彈起之後，今
日要跌低逾１巴仙唞唞，報７０﹒６銀。而野村雖然維持「掃貨」評級，但「他屐」維持５８銀
不變，距離迪仔現價仲有好深嘅潛在跌幅喎；街坊吉利（００１７５）升咗咁多日，亦都腳仔軟
，全日剷低近４巴仙，報２３﹒３５銀。
另一邊廂，神州磚頭佬佳兆業（０１６３８）早前話，將額外發行３張美元優先票據，而噚
日因為據報華人置業（００１２７）執董陳凱韻（甘比）牽頭認購，所以爆起咗兩成，今日勢頭
繼續強勁，飛起近６巴仙，報６﹒６６銀。
街坊龍光地產（０３３８０）就澄清之前冇訂立過任何配售協議，亦都冇就公司股份配售與
任何配售代理進行過任何嘅討論，結果今日股價插水，冇咗逾７巴仙，埋單９﹒２７銀。
＊中銀與協鑫缸邊回回氣，２３２夠牛今天再飛起＊
花旗魚缸噚晚低收，科技同消費品類股份跌幅較大，蘋果股價亦都插近２個巴仙，孖屐擔心
新手機需求唔夠，連香江呢邊手機設備佬瑞聲（０２０１８）都受影響，瞓低近３巴仙，報
１３６﹒６銀。
受到朝鮮局勢影響，金屬期貨大跌，金屬資源佬祖國鋁業（０２６００）喺噚日高見
７﹒５５銀兼創逾六年新高後，今日股價就腳軟軟，無奈收挫逾３巴仙，報７銀。
保利協鑫（０３８００）今日跌近２巴仙；盤中曾高見１﹒１６銀，創逾一年新高。仔仔協
鑫新能源（００４５１）就踢高咗近２巴仙，報０﹒５６銀。
中航工業（００２３２）早前宣布，斥資２４億銀，向母企收購花旗主流通用航空飛機製造
同埋分銷業務，當中１４億銀以代價股份配發及發行方式支付，餘下嗰１０億銀就用現金找埋條
尾數。呢隻中航工業星期三（２０日）單日飛起八成之後，噚日回一回氣今日又再飛起近１６巴
仙，收０﹒７３銀，勁！假期愉快，請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式
之申述或訂立任何建議及推薦，讀者務請運用個人獨立思考能力自行作出投資
決定，如因相關建議招致損失，概與《經濟通》、編者及作者無涉。
【與拍賣官看藝術】常玉作品屢創天價，背後其實藏著跌宕起伏的人生► 即睇
