《小傳日記》恆指公司上星期五（１０日）公布咗季檢後，今朝（１４日）就輪到摩指大執
位。除此之外，繼噚日（１３日）摩笛吹起咗ＡＩＡ（０１２９９）外，今日就輪到花旗豪畀
４０﹒３銀目標價吉利（００１７５），缸友收到風即刻不問價掃貨，吉利飆升逾６巴仙成為最
威水藍戰。
不過，始終中資金融佬無力，加上股王ＱＱ（００７００）聽日放榜前靜觀其變，恆指上半
場衝高１３７點至２９３２０，再創近十年高後，就無力落返嚟，最終收市倒跌３０點報
２９１５２；國指就當然跑輸大市，瞓低８２點報１１６０１，全日魚缸成交１０８２億銀左右
。
講一講缸外話，馬交居民又提早收聖誕禮物喇！永久居民獲派９０００蚊，非永久都有
５４００蚊，真係羨慕死小傳喇！
＊ＱＱ明放榜大行好忙碌，重上紅底股閱文獲祝福＊
ＱＱ聽日就派成績表。作為魚缸入面嘅巨無霸，加上每次放榜成績都有驚喜，一眾外資大行
今日已經爭相出報告，唔少仲將ＱＱ嘅「他屐」升到去４００蚊樓上；其中美銀美林就將「他屐
」由３８６蚊升去４１７蚊。雖然「孖屐」都係一面倒睇好ＱＱ業績，但魚缸創咗十年高，唔少
缸友都謀定而後動，等ＱＱ出完成績先算。而ＱＱ今日亦無咩點郁，報３８８蚊。
ＱＱ拆出嚟嘅閱文（００７７２）喺上個禮拜三（８日）入缸第一日升到去１１０蚊後就收
歛氣焰，噚日仲跌穿埋百蚊關口。今日有唔少缸友趁機撈貨，埋單報１００﹒９銀，升近半成。
＊雷蛇非常戳震到唔敢博，瑞信來祝福師傅即埋鑊＊
雷蛇（０１３３７）噚日入缸第一日有頭威無尾陣，埋單只係升咗１８巴仙，今朝仲一度插
咗近半成。嘩！嚇到散戶連一手半手貨都震晒出嚟。午後見買盤撈貨頂住個價，之後仲彈返上嚟
，飛起咗超過２巴仙，收４﹒６９銀。Ｖｅｒｙ Ｃｈｏｋ呀！
噚日摩笛吹起嘅ＡＩＡ（０１２９９）爆升咗６巴仙破頂後，今日似乎餘威未盡再創新高，
最新山頂位去到６７﹒４５銀，但全日衝前咗唔夠１巴仙，報６５﹒９銀。
莊園牧場（０１５３３）被納入「港股通」名單，單單呢個消息就令到隻股由１１蚊爆升到
最多４７蚊，大嗱嗱升咗超過３倍，但埋單升幅就極速收窄得返９５巴仙，報２１﹒４５銀。
＊納入「港股通」莊園大上落，ＡＩＡ破頂高處不寂寞＊
康師博（００３２２）有瑞信讚好，將評級由「跑輸大市」升到去「中性」，仲將「他屐」
由９﹒７銀升到上１３銀，飛起就一定嫁啦，不過估唔到開市嗰下已經到價，全日一共踢高咗近
７巴仙，報１３﹒３２銀。
不過唔係個個都咁Ｈａｐｐｙ，裕元（００５５１）第三季業績表現都算可以接受，不過囝
囝寶勝（０３８１３）就差啲啦，賺少咗三成半，被大和降評級到持有，不但調低盈測最多２８
巴仙，仲將「他屐」由１﹒９銀降到１﹒４銀，搞到裕元同寶勝分別跌低近８巴仙同逾２０巴仙
。
砵砵車今日好鬼出位，吉利有花旗首次籲買，同俾４０﹒３銀「他屐」，飛起６巴仙報
２８﹒２銀，係是日最叻仔藍戰士！有招商證券唱好嘅街坊華晨（０１１１４）都唔執輸，踢高
近５巴仙，報２２銀。
＊寶勝績倒退媽咪同被質，車仔狂踩油敏實有所失＊
除咗砵砵車開Ｔｕｒｂｏ外，相關零件佬都借勢炒起，而業務集中喺花旗國嘅耐世特
（０１３１６）就啱啱成為摩指旗下神州指數其中一員，即時搞到呢個零件佬起勢炒高，仲一度
跑前晒所有神州砵砵車，最多飛起咗超過１２巴仙，去到最新山頂位１７﹒４４銀，不過埋單升
幅就極速收窄至近半成，報１６﹒２８銀。
街坊敏實（００４２５）就冇乜運行，畀大摩喺神州指數入面叮走，朝早喺最新山頂位
４８﹒８銀插旗後即插水，全日跌咗近４巴仙，報４６﹒５５銀。
之前叫合生元嘅Ｈ＆Ｈ（０１１１２）都畀大摩睇中，被納入香江小型股指數。雖然只係小
型股指數，但缸友收到風都好有驚喜，全日最多飆高超過一成，報４４蚊，創咗超過三年新高，
收市報４３﹒８銀。
＊摩指來寵幸ＨＨ上山頂，你追我又趕水泥佬至正＊
保利協鑫（０３８００）有申萬宏源唱好，升評級至「買入」，同將「他屐」由１﹒０４銀
升到上１﹒８２銀，喺一眾光伏佬中表現都算幾突出，全日跳高３巴仙報１﹒５４銀，盤中高見
１﹒６３銀創兩年高。
水泥佬後尾都追返上黎，瑞信就畀個「Ｌｉｋｅ」海螺（００９１４），維持「跑贏大市」
評級同埋「他屐」４２銀，跳起４巴仙報３３﹒８銀，係第二好表現國貨佬！四川水泥熟料生產
線自１１月６日起全線實施錯峰生產，為期三個月，其他水泥佬表現都唔錯。中建材
（０３３２３）都跟住彈起５巴仙，報６﹒８９銀。至於中材股份（０１８９３）都彈起咗５巴
仙，報５﹒６８銀。請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式
之申述或訂立任何建議及推薦，讀者務請運用個人獨立思考能力自行作出投資
決定，如因相關建議招致損失，概與《經濟通》、編者及作者無涉。
全新節目《說說心理話》青少年不可以戀愛！？真實個案講述驚心動魄經歷► 即睇
