《小傳日記》香江魚缸升到去二萬九樓上嘅高位，又未擺脫整固局面，缸友再次採取炒股不
炒市策略，能夠畀缸友睇中嘅當然非股王ＱＱ（００７００）莫屬喇！自從月中派咗成績表後，
ＱＱ就升唔停，聽日（２１日）佢最新嘅手遊《光榮使命》上線，據聞已然有超過２５３０萬玩
家預約，熱爆到不得了，難怪今日（２０日）由頭升到落尾，收市競價後仲升多咗，埋單以近
１４５億銀大成交炒高逾４巴仙收報４２０銀，市值就快４萬億銀喇，有貨缸友真係發夢都笑醒
喇！
除咗ＱＱ之外，賭仔都發力追落後，不過中資金融佬唱反調，拖低大市表現，今日恆指都係
窄幅上落，就算ＱＱ升得咁勁，大市埋單只係收升６１點報２９２６０；國指單靠急升近８巴仙
的迪仔（０１２１１），就真係唔夠撐，所以都要碌低７０點報１１５３８。
ＱＱ股價沒有最高，只有更高，缸友都爭住掃貨，全日魚缸約１０８２億銀，單係ＱＱ都佔
咗逾１３巴仙，勁！
＊高鑫拍淘寶倒跌點算好，王傳福豪言迪仔急向前＊
砵砵車今日都幾有睇頭，迪仔（０１２１１）董事長兼行政總裁王傳福就揚言，力爭
２０２５年實現營收破萬億人幣，仲話會重組架構，刺激股價彈高近８巴仙，報７４﹒１５銀，
係是日最叻仔國貨佬。街坊廣汽（０２２３８）最多曾經腳軟過逾７巴仙，不過之後都成功收復
部分失地，只係碌低咗近１巴仙，報２０﹒５銀。而吉利汽車（００１７５）就跳高咗近２巴仙
，報２７﹒９５銀。
個名有個「鑫」字嘅高鑫（０６８０８）今日就夠晒戲劇性，獲淘寶２２４億銀入股，真係
非常威水。今日復牌最多曾經跳高過近８巴仙，不過之後好快就倒跌，最多仲插過近１４巴仙低
見７﹒４３銀，最終碌低４巴仙，報８﹒２５銀。
＊易鑫終潛水雷蛇亦流淚，普天多人追濠亮好唏噓＊
半新股散水，唔少掛牌前已經成為市場焦點嘅「新星」都軟弱無力啦，易鑫（０２８５８）
就最慘啦，上市第三日，終於都要失守７﹒７銀招股價，最低見過７﹒６９銀，全日跌低２巴仙
，報７﹒７銀，平招股價。至於雷蛇（０１３３７）都唔係好得好多，低見４﹒０２銀啱啱好守
得住４蚊關口，最終收報４﹒１１銀，腳軟近５巴仙，距離３﹒８８銀招股價都唔係好遠咋。小
ＱＱ閱文（００７７２）都無得避，碌低逾１巴仙，報９５﹒９銀，不過之前實在爆升得太勁
，距離招股價５５銀仲有成丈遠呀！
不過上市新丁當中都有表現特別好嘅，普天通信（０１７２０）就飛起咗近逾１５巴仙，報
１﹒３６銀。濠亮環球（０８１１８）都曾經飆過近２３巴仙，不過最後縮哂水，最後仲要倒跌
８巴仙，報０﹒８銀。
＊賭仔大反擊銀娛好招積，金沙好精靈永利齊急升＊
賭仔今日狀態大勇，午後仲嚟個大反擊添，大行德銀早前就話，即使馬交當局會加強監管中
介人嘅信貸Ｒｅｃｏｒｄｓ，同埋非馬交居民嘅短期存款，但德銀估計呢Ｄ措施，對明年ＶＩＰ
賭收嘅影響都尚算輕微，消息刺激銀娛（０００２７）踢高逾４巴仙，埋單５８銀，係全日表現
最好嘅藍戰士！
另外，街坊金沙（０１９２８）亦都唔執輸，全日吹起近３巴仙，報３７﹒３銀；永利馬交
（０１１２８）同埋新濠國際（００２００）亦圍埋一齊開Ｐａｒｔｙ，收市時分別跳高約５巴
仙及４巴仙，埋單報２２﹒６５銀及２３﹒８銀，實在可喜可賀！
＊瑞信吹淡風中芯無懼衝，東銀鑊氣夠又再高高收＊
中芯（００９８１）上個禮拜夾埋唔見咗近兩成之後，今日終見反彈，雖然佢畀瑞信維持
「跑輸大市」評級，「他屐」就由１１﹒３０銀下調至１１﹒１５銀，但佢一於少理，收市時照
升逾６巴仙，報１１﹒７６銀。
旺旺（００１５１）收市後放榜，全日跳高約３巴仙，報６﹒３７銀。
東銀國際（００６６８）繼上個禮拜五爆升九成之後，今日再剷高近７６巴仙，埋單１﹒３
銀，全日仲曾喺１﹒４４銀嘅高位插旗添，創近六年新高，係今日表現最威水嘅魚毛！
另外，康臣葯業（０１６８１）一手大嗱嗱３７００萬股市前交易，佔已發行股本約４個巴
仙，涉資２﹒４４億銀添，收市時佢剷低不足半個巴仙，埋單７﹒２７銀，算係不過不失喇！
請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式
之申述或訂立任何建議及推薦，讀者務請運用個人獨立思考能力自行作出投資
決定，如因相關建議招致損失，概與《經濟通》、編者及作者無涉。
全新節目《說說心理話》青少年不可以戀愛！？真實個案講述驚心動魄經歷► 即睇
