《小傳日記》魚缸未見大起色，ＱＱ平保試反擊！

　　《小傳日記》香江魚缸噚日（６日）經歷咗「小股災」之後，唔少缸友嚇到三魂唔見七魄，
今日（７日）股王ＱＱ（００７００）雖然力挽狂瀾，但係缸友擺到明未驚完，再加埋花旗國揸
Ｆｉｔ人侵侵承認耶路撒冷為以色列首都，中東局勢令人不安，都令到缸友卻步唔敢入市。
　　香江魚缸全日表現就好似坐過山車，先高開１４１點，好似有番Ｄ勢咁，最多升２５３點至
２８４７８，但點知無力又碌番落去，跣低最多８９點至２８１３４，距離二萬八關只係差百幾
點。好彩食完午飯後，ＱＱ同平保（０２３１８）合力撐住，魚缸又衝番上去，不過都只係以
７８點升幅完場收２８３０３，明顯唔係好穩陣；內房佬舉白旗，國指跣低１１點報１１１５０
。
　　魚缸似乎未真正調整完，缸友唔敢輕舉妄動，全日成交約有１２１０億銀。

＊ＱＱ見反彈入貨係時候，明星半新股閱文最傷感＊

　　股王ＱＱ喺噚日嘅大跌市雖然唔算受好重傷，不過尾市都跌過３巴仙，唔少牛仔又「打靶」
。今日終於見返些少反彈喇，上返去５０天線（３７２﹒５２銀）之上，加上，之前曾畀全城
「最牛價」６０６銀嘅花旗，今日溫馨提示，ＱＱ調整咗咁多，係時候入貨，維持「基本價」
４８２銀。ＱＱ最終跳起逾３巴仙，報３７８銀。
　　明星半新股就唔多掂，閱文（００７７２）碌低咗近７巴仙，失守８０元關，下半場跌得仲
勁，仲要創埋７５銀上市新低，最終報７６﹒７銀，係明星半新股入面最慘嘅一個。至於雷蛇
（０１３３７）就跌低近４巴仙，報３﹒８１銀，３﹒８８銀嘅上市價都失守；易鑫
（０２８５８）亦跣低近６巴仙，報６銀；眾安在綫（０６０６０）都跟住碌低近２巴仙，報
６５﹒３銀。

＊手機佬孖寶彈出又彈入，丘鈦被唱淡無奈把酒泣＊

　　舜宇（０２３８２）同瑞聲（０２０１８）都算係噚日小股災最受影響嘅藍戰士，今朝早佢
地就反彈返唔少，分別踢高過最多５巴仙同近６巴仙，不過開心得唔耐，魚缸升勢就開始收窄，
兩個藍戰士升幅都縮哂水。最終舜宇跳高逾２巴仙，報１１１﹒７銀，而瑞聲都只係踢高近３巴
仙，報１４３銀。
　　丘鈦（０１４７８）就慘啦，被野村將評級由「中性」下調至「減持」，嚇到呢條魚毛今日
再碌低４巴仙，報１３﹒１６銀。仲錄得五連陰，累計挫２２巴仙，慘。

＊魚缸復回穩缸友甚無奈，內房跌得甘四條三悲哀＊

　　孖屐升完又跌，跌完又回穩，一眾缸友對住呢個走勢都覺得好無奈！兩隻藍戰士好彩有新消
息，齊齊飛得起。平保以「港股通」嘅方法嚟購入大象（００００５），足足有成１０﹒１８億
股至約５巴仙，佢仲話呢隻大象好啱自己財務原則，並有望成為佢重要嘅投資夥伴，最後平保應
聲彈高逾２巴仙，埋單７４﹒７５銀；大象行政總裁歐智華就話平保應該係因為保險業務嘅需要
先咁做，而唔係策略性投資，唔會影響大象業務策略。最後，大象收市則升不足１巴仙，報
７６﹒２５銀。
　　另一邊廂，一眾神州磚頭佬就插水喇，「四條三」恆大（０３３３３）受傷，一度插低近一
成至２２﹒８銀，好彩收市跌少好多，全日跌低近３巴仙，報２４﹒５５銀；街坊融創
（０１９１８）就無咗近２巴仙，報３２﹒２５銀；藍戰新貴碧桂園（０２００７）亦唔見咗近
２巴仙，埋單１２﹒２８銀，盤中更一度跌見１１﹒９２添，係今個月首次失守１２元關口呀，
真係陰公豬囉！

＊砵砵車跪低吉利跑拉尾，長汽被唱好股價仍走低＊

　　砵砵車又再跪低，雖然吉利（００１７５）有相當「醒神」嘅消息，第一件係畀高盛維持
「掃貨」評級，「他屐」仲由３１﹒３銀升至３１﹒４４銀；第二件就係佢喺１１嘅總銷量創咗
歷史新高，按年爆升３８巴仙。點知早段高見２６﹒３銀後，但到尾段就腳軟軟喇，結果完場時
仲要剷低近３巴仙，埋單２４﹒４５銀，係全日表現最差嘅藍戰士！
　　另外，街坊長汽（０２３３３）畀富瑞「掃貨」評級，仲話佢旗下品牌ＷＥＹ會好過預期，
其銷情仲會愈來愈好添，但今日佢仍被剷低近２巴仙，埋單８﹒６６銀；比亞迪（０１２１１）
自今個月以來就反覆偏軟，而今日就腳軟逾１巴仙，埋單６３﹒２５銀，盤中更低見６１﹒４５
銀兼失守埋１００天線（６２﹒１２６銀）添！請請！
　
　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。