即市新聞

16/03/2018 17:34

《小傳日記》90歲李超人榮休,長和系四藍戰績優!

  《小傳日記》花旗國噚晚(15日)受到就業及製造業數據強勁支持,道指終於成功反擊抽
升115點報24873點。可惜香江夜期ADR偏軟,搞到魚缸今朝(16日)無晒心機,一
開市就碌低178點報31363,之後曾經衝番上去,不過好快又跌番落嚟,全日都喺50天
線(約31364點)上上落落。全日恆指走低39點完場報31501。國指瞓低46點報
12673。
  既然魚缸又係無咩大方向,缸友都炒股不炒市,繼續搵業績股入貨。再加上富時指數收市後
換馬,全日魚缸成交大增三成至1437億銀。
  相信今日唔少缸友都同小傳心情一樣,除咗關心魚缸走勢之外,最緊張嘅莫過於睇實超人
(李嘉誠),究竟會唔會喺收市後業績記者會上面宣布退休呢,畢竟今年7月就已經90歲,但
超人日日都咁精神奕奕,今日仲有記者朋友拍到佢喺屋企好輕鬆咁拉筋,小傳真係佩服到五體投
地。果然等咗全日,長和(00001)就喺四點半出通告,宣布超人退休,喺5月10日主持
股東大會後離任,轉做資深顧問,由大仔李澤鉅接任。
   
*誠哥要退休長和系高收,電能豪派息表現最得戚*

  當然缸友都好緊張長和系四間藍戰士齊派成績表。電能(00006)中午就已經揭盅,業
績最省鏡,全年多賺近三成,而且仲繼續大派特別息,計埋2﹒03銀末期息,總共派8﹒03
銀,以每手500股計,都有成四千蚊落袋,吸引唔少缸友掃貨,全日踢高超過3巴仙,報
71﹒2銀,仲破埋頂,最新山頂位去到73﹒95銀。
  長建(01038)就全年賺多超過6巴仙,至102﹒6億銀,低過「孖屐」預期嘅
106﹒7億銀,但全日仍彈起近1巴仙,報66﹒9銀。長和同長實(01113)就收市後
先放榜,長和逆市彈起唔夠1巴仙報98﹒9銀,長實就冇乜點郁報70蚊。
  結果收市後,長和公布全年多賺6巴仙收351億銀,略高市場預期;長實就多賺55巴仙
至301億銀,派息升至1﹒28銀。睇嚟股東們應該都開心收貨囉。

*QQ等放榜平保士氣壯,大象向前行生發發好慘*

  股王QQ(00700)一路都四周圍投資,今日竟然傳出佢想用20億美金投資XPR
(瑞波幣),但係QQ好快就走出嚟澄清話係假消息。雖然就算係真,對於QQ嚟講呢個都唔係
咩天大數字,不過呢D虛擬貨幣走勢好似過山車咁,真係唔掂好過掂了。缸友最關心的,當然係
QQ下星期三(21日)派果份成績表喇,今日股價都繼續喺高位徘徊,埋單微跌近1巴仙報
465﹒2銀,憧憬業績有驚喜嘅缸友,最後召集喇。
  平保(02318)承接噚日強勢,喺下星期二(20日)派成績表前重上90蚊關口,收
漲近1巴仙報89﹒65銀,「紅底」不是夢喇!
  另一重磅藍戰大象(00005)呢個月頭耷耷咗咁耐,今日終於逆市行前近1巴仙收
76﹒95銀,喺下周花旗國議息前爭番一口氣。
  不過生發發(00388)就陰功喇。阿爺積極研究推CDR(中國預託證券),就喺呢個
時候,市場又傳出阿里想回A。努力推行「同股不同權」嘅生發發又點會唔受重大打擊,難怪收
挫近3巴仙報282銀,做咗最失色藍戰喇。
  
*碧桂園領帥放榜前急追,世房亦跳舞股東好風騷*

  3月業績期已經過咗一半,開始輪到祖國磚頭佬派成績表,缸友都唔執輸趁公布前入貨,當
中碧桂園(02007)下星期二揭盅,而早喺上個月中左右,佢已經率先發盈喜,估計舊年多
賺逾九成,缸友都趕搭尾班車,難怪收市又踢高近5巴仙收16﹒56銀,係最威水藍戰喇。
  街坊世房(00813)表現更出色,雖然比碧桂園遲成個星期先放榜,但係今日都衝高近
7巴仙報23﹒2銀。中駿(01966)公布噚日公布全年多賺37巴仙至逾28億人仔後,
麥格理唱好維持「跑贏大市」,維持6﹒01銀目不變,距離現價仲有大把水位,難怪埋單收漲
逾6巴仙報4﹒6銀,仲曾經創4﹒69銀上市新高喇!
  至於加入富時中國指50嘅洛鉬(03993)、舜宇(02382)就回吐1至2巴仙,
收6﹒64銀及144﹒2銀,只得龍湖(00960)踢高逾1巴仙。而被剔除嘅中國信達
(01359)、中國銀河(06881)及中冶(01618)就齊齊唔見近1巴仙。

*賓仕急散水高追心都碎,易鑫好頭暈業績嚇親人*

  再好飲嘅珍珠奶茶,飲得多都會厭,寶島天仁茗茶香江代理商賓仕(01709)喺今個禮
拜三(14日)正式入缸,頭兩日已經坐火箭爆升最多近7倍,但升到咁高自然有唔少缸友食胡
走人,今日急插近三成,報4﹒01銀,不過仍然較招親價1蚊高超過三倍,揸緊貨嘅缸友每手
賺萬二蚊。
  曾經紅極一時嘅新經濟半新丁易鑫(02858)如今過晒氣不特止,仲要持續潛水,易鑫
噚日放榜,舊年全年蝕咗超過183億人仔。雖然背後有QQ撐腰,但蝕到咁都好難有缸友掃貨
支持,全日急插近7巴仙,報5﹒75銀。
  專搞手提電話外殼代工嘅通達(00698),終於分拆咗做手提電腦同平板電腦外殼代工
嘅通達宏泰(02363)入缸,今日表現都唔差,最多升咗超過32巴仙,埋單報2﹒4銀,
高招親價2﹒3銀超過4巴仙,每手賺250蚊。
  搞半導體銷售嘅光麗科技(06036)首日入缸都攞返個頭彩,最多爆升超過1倍,埋單
報0﹒9銀,較招親價0﹒5銀高80巴仙,每手賺2000蚊。假期愉快,請請!
 
  《編者按》本欄搜羅即日熱門傳聞,惟消息未經證實,《經濟通》亦不保證內容之準確性
       本文只供參考之用,並不構成要約、招攬或邀請、誘使、任何不論種類或形式
       之申述或訂立任何建議及推薦,讀者務請運用個人獨立思考能力自行作出投資
       決定,如因相關建議招致損失,概與《經濟通》、編者及作者無涉。

【你點睇】的士記分制將於周末生效,你認為該制度可否幫助的士提升服務質素?► 立即投票

人氣文章
財經新聞
評論
專題
專業版
HV2
精裝版
SV2
串流版
IQ 登入
強化版
TQ
強化版
MQ

【嚴正聲明】《經濟通》呼籲公眾提高警覺留意偽冒《經濟通》投資群組

如何分辨問米是否真實?通靈問事用什麼工具都可以?靈靈法即場示範通靈!

etnet榮獲HKEX Awards 2023 「最佳證券數據供應商」大獎

貨幣攻略

大國博弈

說說心理話

Watche Trends 2024

北上食買玩

Art Month 2024

理財秘笈

夏天養生食療

消委會報告

山今養生智慧

輕鬆護老