《小傳日記》老老實實，呢排全世界都睇住貿易戰發展成點，差Ｄ就唔記得花旗國下個月隨
時加息。而花旗聯儲局最新會議記錄顯示，大多數委員都仲係「鷹派」，認同下個月要加息。不
過就覺得通脹升勢其實唔算太勁，加息步伐又唔使過急。道指就稍為鬆一口氣，即時由跌轉升，
收高５２點至２４８８６。
不過環球孖屐實在有太多隱憂，噚日（２３日）香江魚缸先大跌近６００點，缸友更加唔敢
輕舉妄動，否則貪字得個貧，隨時做埋大鱷點心。香江魚缸今朝（２４日）象徵式踢高５３點，
之後只係窄幅上落，全日高低波幅都只得約２００點，好彩收市都有９４點進帳報３０７６０；
國指就踢起６１點報１２１５２。魚缸無方向，全日成交又縮返逾２２巴仙至８９９億銀。
而缸友就繼續「炒股不炒市」，今日被睇中咗嘅就係股王ＱＱ（００７００）、同阿里巴巴
持有嘅囝囝喇，當中阿里影業（０１０６０）同阿里健康（００２４１）各自有逾１３億銀成交
，各自比起大象（００００５）成交多成八成，咪話唔犀利！
＊阿里傳回Ａ囝囝齊高飛，ＱＱ系跟升４１９最勁＊
話明「炒股不炒市」，缸友都搞盡腦汁搵貨炒，靜咗好耐嘅阿里系竟然落鑊！阿里巴巴呢排
就熱傳下個月以ＣＤＲ方式回Ａ，而囝囝們都十分精彩！阿里健康自從上星期四（１７日）公布
季績後就坐火箭升空，今日仲去到７﹒８４銀。不過期間已經累升咗近７７巴仙，收市無晒火只
升逾１仙報６﹒８９銀，都好正常啫。同系兄弟阿里影業就接力衝高，全因為大摩奏起魔笛，雖
然只係畀「持平」評級，同０﹒９５銀「他屐價」，但係能夠首獲大摩垂青，缸友雙眼都發晒光
，不問價掃貨，阿里影業埋單爆升近３２巴仙，收１﹒２１銀，威盡全場！
阿里系咁威水，ＱＱ系又點會比佢獨霸天下，旗下囝囝華誼騰訊（００４１９）、華南城
（０１６６８）、恆騰（００１３６）分別升逾１５巴仙報０﹒４９銀，漲逾８巴仙報１﹒８５
銀，以及升近５巴仙收０﹒３３５銀。股王ＱＱ就無升跌收４０７銀。
＊沽空又出手新秀麗敗走？千億不復再美圖一殼淚＊
唔單止靜咗一排嘅魚毛落鑊，就連好耐無出擊嘅沽空機構都出手！Ｇｌａｕｃｕｓ前研究總
監創辦嘅Ｂｌｕｅ Ｏｒｃａ狙擊新秀麗（０１９１０），直斥公司ＣＥＯ虛報履歷，交易多數
同佢家族有關，又批評會計準則有問題及企業管治差，只係值１７﹒５９銀，即係畀噚日收市價
足足低逾４８巴仙，嚇到新秀麗最多急插１２巴仙後仲停埋賽，以待發澄清公告。新秀麗停之前
就報３０﹒７銀，仲坐緊貨嘅缸友，都係有定心理準備好Ｄ喇。
另一邊廂，昔日基金愛股美圖（０１３５７）亦突然被缸友拋棄，最低試過唔見一成至
７﹒５３銀，差ＤＤ就穿埋２０１６年１２月嘅７﹒４６銀上市新低，收市時就跌少好多，都挫
近３巴仙報８﹒１７銀。其實翻查資料，美圖當年以８﹒５銀招親價上市，曾經風光一時，驚見
２３﹒０５銀新高，挑戰過千億市值，只可惜，一切已不復再了！
＊唔怕季績差聯想倒升喇，民眾跌到驚有貨面都青＊
講到不復再，昔日嘅藍戰士聯想（００９９２）中午時派季績，全年盈轉虧蝕１﹒８９億美
金，主因受累稅務資產撇帳，而第四季度盈利都差過預期，不過全年收入達４５４億美金，係３
年新高，缸友竟然投下信任一票，結果聯想成功反擊，收升２巴仙報３﹒９１銀，仲一度高見４
蚊收復５０天線（約３﹒９４銀）添。
民眾（００２７９）就無咁好彩，股價喺今個月嚐盡苦頭，月頭跌穿１蚊關後，就好似食咗
瀉藥咁跌到唔識停，今日仲要連１毫子關口都穿埋，最低見７﹒２仙，粉絲們都無眼睇。就算收
市跌少咗，但都插低近１５巴仙，報８﹒７仙，呢個月都係要蒸發逾九成，慘。
＊楓葉繼續升破頂係好醒，資源佬走高油煤佬造好＊
呢排教育佬走勢好勁，大市無咩力都照樣衝前，楓葉教育（０１３１７）建議股份一拆二，
今日最高見過１４﹒６６銀繼續尋頂，埋單彈高６巴仙，報１４﹒４銀，今個月累計已經飛高咗
３２巴仙，厲害！街坊新高教（０２００１）傳遭平保間接持有嘅Ａｄｖａｎｃｅ
Ｖｉｓｉｏｎ減持，早段曾經腳軟過近７巴仙，最終收復部分失地，只係碌低近１巴仙，報
７﹒２３銀。
噚日資源佬戰況好慘烈，好彩今日大部分都成功反彈。中石化（００３８６）上日急跌６巴
仙，是日成功踢高近超過２巴仙。至於神華（０１０８８）都做得唔錯，衝前２巴仙，報
２０﹒２銀。請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式
之申述或訂立任何建議及推薦，讀者務請運用個人獨立思考能力自行作出投資
決定，如因相關建議招致損失，概與《經濟通》、編者及作者無涉。
【你點睇】美眾院通過法案，香港駐美經貿辦恐遭關閉，你是否支持中方對此作出強烈反制？► 立即投票
