《小傳日記》中美有計傾，跌勢漸減輕；企鵝終回升，好友暫獲勝！

　　《小傳日記》花旗國有缸友爆料話，侵侵（特朗普）諗住用出口管制、起訴等手段，去打擊
神州知識產業侵權嘅行為，跟住佢又再喺推特（Ｔｗｉｔｔｅｒ）上面亂咁噏，話民主黨係近日
美股「冧檔」嘅幕後黑手，因為佢地話要調查白宮而引發投資者恐慌。另外，又有跡象顯示，蘋
果新「唉瘋」唔賣得，蘋果同其他科技街坊統統插水；高盛又因為捲入大馬貪污醜聞而急瀉近８
巴仙，道指隔晚（１２日）就蒸發咗６０２點。
　　外圍風高浪急，香江呢邊亦都風雨交加，魚缸今朝先低開５４０點，好彩嘅係已經係全日最
大跌幅，低見２５０９２點之後，就有消息話花旗國財長努欽同神州國務院副總理劉鶴有返計傾
，好友即刻大舉進軍，頹咗兩日嘅ＱＱ（００７００）都暫時精神返，最多反彈近２巴仙，魚缸
下晝過後仲收復返晒所有跌幅，之後仲愈升愈有，魚缸最終更以全日最高位收市，報２５７９２
點，企穩廿天線（２５５３３點），升１５９點，升逾半個巴仙。主板成交９０９億銀，較噚日
多咗２４巴仙。國貨收報１０４７８點，升３８點。滬指收報２６５４，升２４點，升幅接近１
巴仙。

＊德銀潑冷水企鵝仍進取，瑞聲險甩難舜宇終反彈＊

　　ＱＱ聽日就會派成績表，但績前已經被「孖屐」，早幾日被高佬降「他屐」後，德銀亦都潑
冷水，話佢第三季業績冇乜睇頭，「他屐」降到去３２８蚊。而法巴都「唔輸蝕」，將ＱＱ「他
屐」由４００蚊調低至３５０蚊，評級就維持喺「掃貨」。企鵝今朝開市冇耐一度唔見咗約４巴
仙，之後陸續有缸友入市撈底，下晝之後更反彈近２巴仙，最後埋單進帳超過１巴仙，報
２７４﹒４銀。其他重磅大佬就各有各走，大象（００００５）跌咗近半巴仙，報６４﹒７５銀
；生發發（００３８８）就升近１巴仙，報２２４﹒８銀；神州移動（００９４１）同ＡＩＡ
（０１２９９）繼噚日做咗撐市功臣彈起近２巴仙後繼續強勢，今日前者彈起超過１巴仙，報
７５﹒１銀；後者仲勁，升咗近２巴仙，報６４﹒７５銀。
　　噚晚蘋果公司等矽谷科技佬插晒水，跟蘋果搵食嘅瑞聲（０２０１８）近排都冇乜運行，今
朝一度失守５０蚊兼低見４９﹒０５銀，創近兩年半新低後有返Ｄ反彈，尾市仲執返身彩，最終
反彈１亳子，報５３﹒２銀。舜宇（０２３８２）可能因為冇跟蘋果搵食嘅關係，連跌六日唔見
咗近１１巴仙，全日彈起近３巴仙，報７３﹒９５銀。

＊紐期跌到突連跌１１日，油佬慘遭殃鐵鳥好馨香＊

　　雖然花旗國制裁伊朗喺今個月頭正式生效，但仍然暫時准許伊朗賣石油畀部分國家，加上其
他產油國計劃增產，而需求又有減弱跡象，油價近排都插緊水，紐約期油更連跌１１日，創史上
最長跌浪，搞到「三桶油」都冇運行，中海油（００８８３）碌低超過３巴仙，報１３﹒３２銀
，仲要喺全日最差嘅藍戰士，慘！神州石油（００８５７）就跑尾二，唔見咗逾１巴仙，報
５﹒８８銀。神州石化（００３８６）因為下游業務重，油價跌個陣都有著數，全日彈起近半巴
仙，報６﹒６６銀。中海油服（０２８８３）跌咗超過兩巴仙，報７﹒３２銀。
　　噚晚美匯指數強勢衝破９７關，兼喺１６個月高位插旗，人仔自然就腳軟，但油價插水對神
州飛鳥有利降低成本，缸友選擇性聽好消息嘅情況下，鐵鳥全線高飛，南航（０１０５５）急升
超過４巴仙，報４﹒９８銀。國航（００７５３）亦飛高近４巴仙，報７﹒３８銀。東航
（００６７０）跳起超過１巴仙，報４﹒８８銀。劇飛（００２９３）雖然仲有燃油對沖合約係
手，油價跌咗對佢唔多有著數，但今日都飛起超過１巴仙，報１０﹒６６銀。

＊野村讚濠賭股價升得好，指數上落閃內需齊避險＊

　　話說十一黃金周之後，個個都猛吹話馬交個邊世界末日啦、無人去馬交賭錢云云，但大行野
村就力撐馬交佬，話馬交１１月博彩收入達８﹒４１億澳門元勝預期，該行認為馬交賭收勝預期
係打破「濠賭股將會出現暴跌」嘅睇法，濠賭股今日都逆勢而上。銀娛（０００２７）升逾３巴
仙，報４４﹒１銀。永利馬交（０１１２８）升近３巴仙，報１６﹒１銀。澳博（００８８０）
升逾１巴仙，報６﹒５銀。美高梅（０２２８２）升近２巴仙，報１１﹒７６銀。金沙
（０１９２８）升唔夠半巴仙，報３１﹒５銀。
　　今日魚缸走勢波動，唔少內需股都成為避險首選。恆安（０１０４４）升逾２巴仙，報
６４蚊。豬肉佬萬洲（００２８８）升逾２巴仙，報６﹒２２銀。蒙牛（０２３１９）升近３巴
仙，報２４﹒７５銀。康師傅（００３２２）升近２巴仙，報１２﹒９２銀。

＊走勢終見牛吉利冠藍籌，業績唔報捷偉易達急跌＊

　　神洲經濟增長放緩，好多砵砵車都唔再有咁多人買，但大和就力撐，話缸友雖然少買咗車，
但眼見吉利旗下品牌「博瑞」依然需求強勁，因此應該仲有得升下。吉利（００１７５）連跌五
日兼五連陰，累挫近１４巴仙後，今日強勢反彈近半成，報１５﹒１銀，仲要係全日最叻藍戰士
，勁！長汽（０２３３３）升近３巴仙，報４﹒７２銀。吉利都帶挈其他街坊造好，東風
（００４８９）升逾１巴仙，報７﹒５９銀。華晨（０１１１４）跌逾半個巴仙，報６﹒４７銀
。
　　另外，教育玩具大王偉易達（００３０３）話受貿易戰影響而業績急挫，各間大行都大潑冷
水，股價自然凍過水，今日暴瀉近１２巴仙，報７９﹒５銀。梳化大王敏華（０１９９９）都表
示中期溢利回落逾１６巴仙，所以今日都跌咗近３巴仙，報３﹒６５銀。金軟（０３８８８）雖
然第三季轉盈為虧，但盈收增長加快，因此都有缸友追捧，全日升近３巴仙，報１２蚊。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。