《小傳日記》呢兩日市場坐過山車咁，少啲心血都真係出晒事，昨日（２１日）穿過二萬七
之後，今日迎來大反彈，盤中升過５００點直上２７７００點關口。市場既憂慮變種會唔會侵襲
，又憂慮大企業業績影響投資者情緒，所以唔少無貨缸友都係睇定小小。
另一方面，香江呢邊近日都一地花生殼，皆因恆大（０３３３３）近期消息多蘿蘿，真係花
生都剝唔完。先傳出資金被人凍結後解凍，之後恆大係香港嘅樓盤暫時被多間銀行拒絕做按，得
東亞（０００２３）肯捱義氣，之前做開嘅就繼續做。
歸根究柢，都係市場擔心恆大資金鏈問題，恆大係咪真係「大到不能倒」，呢一點似乎係有
人想試水溫，上午放消息，下午就解凍，莫非係「有人」想睇睇市場反應？不過唔少住揸住恆大
系股票嘅都應該一殼眼淚，事關近期股份都由高位蒸發一半有多，特別係城中某位「富豪」係恆
大粉絲，不理恆大出嘅股定債，總之買左先講，帳面條數係點就唔使講啦。
此外，恆大為撲水，幾乎咩都想拎來香港上市，之前話礦泉水業務，今日再有消息話將研究
旅遊業務上市可能性。不過，而家全世界都知恆大危危乎，上市定價一定被人壓價壓到喊，而散
戶係咪覺得值得認購，就自行思考啦！
不過如果呢幾日跌市先買嘅話，你就有福啦！今日恆大系走勢靚仔，好似恆大汽車
（００７０８）就曾經升過三成，一手都有千幾蚊執下，不過有無膽買都係一個問題，我就自問
膽仔細細，無能力賺呢啲錢啦。
其他恆大系方面，恆大汽車（００７０８）升兩成，報１５﹒８８銀；恆騰（００１３６）
升近９巴仙，報４﹒３銀；恆大（０３３３３）升近８巴仙，報７﹒８１銀，恆大物業
（０６６６６）升近４巴仙，報６﹒９３銀。
恆大系股份表現如下：
股份（編號） 現價 變幅
－－－－－－－－－－－－－－－－－－－－－－－－－－－－－－
恆大汽車（００７０８） １５﹒８８元 升２０﹒３％
恆騰（００１３６） ４﹒３０元 升８﹒８６％
盛京（０２０６６） ６﹒９０元 無升跌
恆大（０３３３３） ７﹒８１元 升７﹒８７％
恆大物業（０６６６６） ６﹒９３元 升３﹒７４％
－－－－－－－－－－－－－－－－－－－－－－－－－－－－－－
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式
之申述或訂立任何建議及推薦，讀者務請運用個人獨立思考能力自行作出投資
決定，如因相關建議招致損失，概與《經濟通》、編者及作者無涉。
【你點睇】美眾院通過法案，香港駐美經貿辦恐遭關閉，你是否支持中方對此作出強烈反制？► 立即投票
