《財自密碼－何金水》ＴＶＢ已成炒股，但斷估唔會炒一期咁簡單

　　《財自密碼》呢幾個禮拜因為美國個嗰邊嘅銀行倒閉問題，引起嘅連鎖反應席捲全球，係好
似香港市場唔多受影響。不過，港股都係照跌，畢竟加息呢家嘢一路都夾死香港股市，不論融資
定買樓都唔太熾熱，連新股市場都無咩人講。　　
　　但係另一邊廂，有啲細至中嘅股仔喺度炒下炒下，講緊嘅就係電視廣播（００５１１），金
水都玩咗一輪，其實都係鬥快Ｃｌｉｃｋ　Ｍｏｕｓｅ。之後係連登見到有人講，話ＴＶＢ變成
妖股，又話割韭菜云云，以金水咁多年炒細價股經驗，佢可能有妖味，但妖味都有分濃淡。
　　所以濃味，即係有「搭棚」呢個動作，正常股份升三浪至五浪，點都會大回一下再上；而有
「搭棚」嘅股份，升七浪八浪都唔係問題，因為股價平、市值細，基本上都係靠微信女搵人落搭
，所以上七八九十浪都唔係問題，成交細容易辦到；呢次ＴＶＢ一來就四支陽燭扯高，乜棚都無
，連其他大莊都一齊落場炒埋一份，兩蚊炒到近十八蚊再散水，兩個禮拜一氣呵成。
　　又咁睇，以前遇上呢類情況，大公司會主動申請停牌，再睇睇乜情況再定奪；不過ＴＶＢ乜
聲都無出過，任由其他人將個股價舞高弄低。個人唯一解讀就係內部中人一早知有其事，借帶貨
消息炒高再散貨，都總好過張股價圖表好似心臟停頓。經過呢一論電擊，呢一期ＴＶＢ啲成交量
先升返些少。一隻唔搭棚嘅炒股，我斷估唔會炒一期咁簡單，所以入少少睇中線，剛好呢篇稿交
上去時後就係ＴＶＢ放業績，所以必然炒上炒落。
　　另外，單睇圖表，港股走勢不太樂觀，美國銀行問題未完全解決，內地消費力又未谷起，俄
烏戰事持續同北韓近期頻頻射導彈，呢兩個炸彈又未拆，恒指分分鐘再潛水都有可能，單睇圖都
唔覺得佢會有彈起可能性，買多隻恒指ＰＵＴ輪放喺度做保險都好。其他倉位繼續持有睇多轉。
《何金水》
　
　　　　　　　　　　百萬倉位如下（截至２０２３年３月２８日收市）
　　　　　　　　　　＝＝＝＝＝＝＝＝＝＝＝＝＝＝＝＝＝＝＝＝＝＝
　
持有股份　　持有股數　　買入價　　賣出價　浮動賺╱蝕　　　　收市價　　　　　市值　　
－－－－－－－－－－－－－－－－－－－－－－－－－－－－－－－－－－－－－－－－－－
　復銳　　　　８千股　１５﹒８元　　　　－２﹒７３萬元　１２﹒３８元　　９９０４０元
海底撈　　　　１萬股　２３﹒６元　　　　　－３﹒２萬元　２０﹒４０元　２０４０００元
　理文　　　　１萬股　３﹒６１元　　　　　－１８００元　　３﹒４３元　　３４３００元
無線廣播　　　１萬股　９﹒４８元　　　　　　　　　　０　　９﹒４８元　　９４８００元
　認沽　　１００萬股　０﹒０７元　　　　　　　　　　０　　０﹒０７元　　７００００元
總持貨　　　　　　　　　　　　　　　　　　　　　　　　　　　　　　　　５０２１４０元
餘下現金　　　　　　　　　　　　　　　　　　　　　　　　　　　　　　　４３６７００元
－－－－－－－－－－－－－－－－－－－－－－－－－－－－－－－－－－－－－－－－－－
　
　
＊編者按：本文只供參考之用，並不構成要約、招攬或邀請、誘使、任何不論種類或形式之申述
或訂立任何建議及推薦，讀者務請運用個人獨立思考能力自行作出投資決定，如因相關建議招致
損失，概與《經濟通》、編者及作者無關。