RSS訂閱 恒生指數公司上星期五（１０日）收市之後公布意外驚喜，近排表現超然嘅吉利（００１７５）「黑馬」姿態晉身「藍血一族」，利豐（００４９４）最終難逃被貶厄運，正式被奪去「藍戰」之名。兩者今朝（１３日）表現「天與地」，吉利再衝前最多逾５巴仙至
１０﹒６銀，利豐就黯然碌低最多逾５巴仙。
染藍效應有幾強？睇番上一次瑞聲（０２０１８）表現。喺舊年８月１２號收市後，瑞聲獲加入藍血。被升級前三個月，股價已累升逾四成，而升級後都仲有力行前多兩成。不過喺９月２號檢討生效後，高見９０﹒６５銀就無力，要展開回吐之旅，更跌穿埋宣布染藍當日嘅股價（約７６銀）。當然，有「食力」嘅股，調整完後，近日已經隨市升番上去，今朝曾見逾８４銀。
但睇埋吉利就更誇張，由舊年７月初反覆升到依家，以暫時１０﹒７６銀最高價計，大約累漲咗逾１﹒５倍，市盈率遠遠高過同業，市值更逾９５６億，勁過磚頭佬信置（０００８３）、銀行佬東亞（０００２３）等。相信喺下個月６號生效前，吉利再大幅飆升機會唔大，缸友唔好亂上車喇。
《編者按》本欄搜羅即市傳聞，惟消息未經證實，《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情
