RSS訂閱 花旗國魚缸升咗咁耐，噚晚終於都急插水，三大指數齊齊跌咗超過１巴仙，道指更係高台跳水，跌２３７點，創咗舊年十月初以嚟最大嘅單日跌幅。外圍插晒水，香江自然難以獨善其身，今朝開市低開２５６點，半日大玩「瀡滑梯」，跌咗三百幾點。
雖然噚晚花旗國魚缸跌到咁勁，但係蘋果公司竟然創上市以嚟新高，山頂位去到１４２﹒８美金。蘋果之所以破頂，主要係佢好低調咁推出紅色版ｉＰｈｏｎｅ７／７Ｐｌｕｓ。花旗國個邊嘅缸友似乎都幾受落，都比咗唔少好評，成功推蘋果股價去到山頂。
智能手機同半導體行業息息相關，智能手機近年持續升呢，市場對手機需求持續上升，半導體訂單自然水漲船高。中芯國際（００９８１）雖然仲未能夠同台積電、ＩＮＴＥＬ等龍頭大哥平起平坐，但中芯話晒係神州半導體行業嘅地位都算顯赫，加上中央有增無減咁，又出錢又出力去提升祖國半導體產業，中芯更目標成為全球第五大半導體廠，前景值得睇好！
睇番公仔圖，中芯今年以來都上演「插水」戲碼，年頭到而家跌咗接近兩成，佢嘅街坊
ＡＳＭ（００５２２）同華虹半導體（０１３４７）就一直跑出，分別升咗逾兩成同近１８巴仙，中芯明顯跑輸唔知幾多個馬位，今日仲要跌穿埋１０銀關口，缸友們都可以寄望中芯獲北水睇中，不妨上車追一追落後。
《編者按》本欄搜羅即市傳聞，惟消息未經證實，《經濟通》亦不保證內容之準確性。
【你點睇】的士記分制將於周末生效，你認為該制度可否幫助的士提升服務質素？► 立即投票
