RSS訂閱 北韓肥仔恩狂妄自大就喺人都知，雖然佢成日話要打殘花旗國同架仔，仲有泡菜國，每次都只不過係齋嗡，但肥仔恩始終唔按牌理出牌，常人往往好難估佢下一步會做咩，加上前幾日係佢阿爺金日成嘅冥壽，呢幾日係咁大放厥詞，嚇到班缸友都唔係好敢入市，香江魚缸呢兩日嘅表現真係冇眼睇。
肥仔恩搞到環球唔少魚缸表現咁鬼運滯，但終究會有ｄ抗跌力比較強嘅魚仔值得缸友去吼實。專幫三葉草、架仔ＵＮＩＱＬＯ同花旗國ＮＩＫＥ做針織代工申洲國際（０２３１３）
派息愈嚟愈闊佬，除咗年年都有升之外，仲要係每一年都有特別息派畀缸友，舊年全年就一共派咗１﹒２銀，多出１２﹒１巴仙。另外，申洲嘅防守力都幾有睇頭，呢兩日都枕住有得升，今日仲上返５０銀關口，如果守得住，應該都有力挑戰高位。
除咗防守力勁，申洲嘅業績前景同樣都相當有睇頭，習大大成日叫人做多ｄ運動，運動服裝需求咁大，三葉草同ＮＩＫＥ呢幾年係神州都好賣得，加上又係兩大運動品牌龍頭，神州中產又愈嚟愈多，點都要買多幾件來路貨去襯托吓自己，做代工嘅申洲自然可以搭順風車，訂單大有機會可以枕住升。另外，ＵＮＩＱＬＯ銷售雖然唔多靚仔，但佢始終都係中低端衣服市場嘅龍頭，申洲嚟自ＵＮＩＱＬＯ嘅訂單都會幾穩定，前景當然可以睇好啦。
《編者按》本欄搜羅即市傳聞，惟消息未經證實，《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情
