RSS訂閱 魚缸走勢真難估，上星期失守廿天線，本來以為調整不遠矣，點知噚日（１９日）股王ＱＱ（００７００）發力撐住，加上賭仔呢排氣勢又好，魚缸暫時都只係輕微腳軟幾十點。缸友觀望Ａ仔係咪會入摩，一般都認為今次Ａ仔入摩機會大過五成，睇嚟後市缸友仲有唔少獲利機會！
由於大市已經炒起唔少，要對公司作出恰當嘅估值唔係容易嘅事，不過獲得主席提私有化嘅華熙生物（００９６３），竟有一個畀缸友好好參考嘅指標！點解咁講？因為主席所提出嘅私有化作價，每股係１６﹒３銀，比前收市價溢價約１４巴仙，較現價計仲有大約６至７巴仙水位可以賺！
公司話私有化原因係因為公司股份流通量處於低水平，又話公司股價未令人滿意。睇返公司年報，過往幾年公司收入、毛利同純利都一直上升，係間賺錢嘅企業，而公司係全球最大的透明質酸原料生產商之一，證明公司都有返咁上下實力。即使最終私有化失敗，股價都有實力上升，既然現價（約１５﹒４銀）仲係低過私有化作價，缸友不妨買少少博一博！
《編者按》本欄搜羅即市傳聞，惟消息未經證實，《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情
