RSS訂閱 魚缸近呢兩日都氣勢如「熊」，皆因朝鮮肥仔恩同花旗國侵侵連日嚟針峰相對大打口水戰，肥仔恩仲話要送侵侵四支導彈。雖然肥仔恩向來聲大夾惡兼齋嗡唔做，但環球金融「孖屐」依然畀肥仔恩嘅一舉一動嚇到面青青，加上神州同印度兩個大國似乎就邊界問題傾唔掂數兼準備開拖，缸友都湧晒去買黃金。
香江魚缸入面繼續有唔少板塊跌到一仆一碌，神州電器佬就係其中一個好例子。專賣電視嘅創維數碼（００７５１）喺今年三月築咗雙頂之後就相當運滯，加上佢嘅電視甚至係神州嘅黑色家電銷售不斷插水，創維股價當然插埋一份，今日同噚日仲創埋近一年半新低，今日朝早就暫時低見３﹒９３銀。
其實唔止創維嘅銷售腳軟，就連全球電視一哥三叔喺神州都撈得唔係好掂，主要都係神州對電視嘅需求已經冇之前咁勁。今年第一同第二季，神州嘅液晶電視銷量按年跌咗８﹒４巴仙同
１巴仙。除咗需求唔掂，創維仲要面對東瀛同泡菜國嘅競爭，有分析仲預測，為咗提升銷量，過江龍牌子仲諗住減價促銷，喺兩面受敵吓，似乎創維都未能夠可以走出谷底。
睇返創維嘅最新銷售數據，七月電視機銷售量１０９﹒４萬部，按年跌咗一成半，當中神州「孖屐」跌得仲甘，同比減少２１﹒５巴仙，至４７﹒８萬部。雖然創維前排搵咗ＱＱ
（００７００）一齊搞視頻業務，但大行都預期最快都要明年先至會有驚喜，睇嚟神州電視「孖屐」一日未反彈，創維都難以翻身，估計股價都仲要繼續喺低位潛水，建議想入市撈底嘅缸友都喺要相當小心。
《編者按》本欄搜羅即市傳聞，惟消息未經證實，《經濟通》亦不保證內容之準確性。
【你點睇】的士記分制將於周末生效，你認為該制度可否幫助的士提升服務質素？► 立即投票
