RSS訂閱 花旗國魚缸噚晚（１５日）無咩方向，今朝（１６日）呢邊魚缸就高開６３點，內地錢莊又跑出嚟撐起個市，暫時幫魚缸重返廿天線（約２７２５５點）。
內地銀監噚日公布商業銀行上半年多賺近８巴仙，不良貸款率維持喺１﹒７４個百分點無惡化，有分析話五大內銀（工、建、農、中、交）盈利增長可以跑出，搞到缸友噚日爭住搶貨。到今朝又繼續飆前，報道話魚缸憧憬緊人行降準，有分析話連續三季緊縮政策已經對經濟構成負面影響，加上人仔貶值壓力有所紓緩，有降準空間。降準可以釋放資金流動性，有大行喺前年人行降準時預測降準對內地錢莊淨息差同稅前盈利有正面影響。
博客本欄上個月２０日建議大家入番多少大型內銀等業績，有入貨嘅缸友相信都已經賺緊，多數內銀股價已經上番去保歷加通道上半部分，相信升勢會持續一排，一於繼續揸住等派成績表同埋食住花生睇下係咪真係有得降準，績後再決定放唔放貨。
《編者按》本欄搜羅即市傳聞，惟消息未經證實，《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情
