RSS訂閱 香江魚缸就嚟到各大公司公布季績嘅時期，先兩日鞍鋼（００３４７）就畀定預告各位缸友，話預期今年頭三季按年多購２﹒３６倍喎，個數字咁靚仔，隻股（１６日）噚日已經升咗３﹒５巴仙，今日（１７日）仲有進帳，博客自然要望多兩眼啦！
富瑞最新就發表咗份報告，指出唐山今年嘅冬季限產早過預期，令鋼鐵嘅價格因此而上升，可能部分缸友就會話，限產嘅情況下，價格點升都無用啦！咪住，望真啲原來鞍鋼同另一位街坊馬鋼（００３２３）都係唔喺限產嘅範圍入面，相信可以借機食住條水啊！
不過，大家都要留意返，鋼材嘅價格始終較為波動，加上阿爺各種去產能同環保政策影響，股價可能都未必可以長時間維持升勢，睇返公仔圖，每次升幅周期都唔會太長，大家要睇準時間沽貨啊。
鞍鋼嚟緊月底３０號就會正式公布業績啦，缸友們不妨趁績前買定，到公布業績就食胡。大摩最新就畀咗鞍鋼７﹒９銀嘅「他履」同「增持」評級，最近牛市咁旺，相信短期內好快可以上到去啦，大家可以諗下現價追入，仲有水位！
《編者按》本欄搜羅即市傳聞，惟消息未經證實，《經濟通》亦不保證內容之準確性。
【你點睇】美眾院通過法案，香港駐美經貿辦恐遭關閉，你是否支持中方對此作出強烈反制？► 立即投票
