魚缸今朝(21日)狀態大勇,朝早隨外圍高開262點報31811。其後隨多隻內房佬、平保(02318)績佳造好、舜宇(02382)再破頂,以及「三桶油」齊齊衝前,刺激大市上半日一度試過升428點報31978點,逼近三萬二關口,一眾缸友都高興得樂而忘返啦!
今日除咗要關注股王QQ(00700)放榜外,博客留意到呢隻中海外(00688),事關佢今朝有D鑊氣,暫時係第二佳藍籌,可望趁業績期借勢博炒上!
最近路透社仲測算,指出2月70個大中城市新建商品住宅價格指數,連續升咗29個月喇,漲幅仲較上月高5個巴仙,叻!若然呢個勢頭仍然持績,內地磚頭價格可望愈升愈有,有利內地磚頭銷情。
野村證券之前仲表示,預計中海外舊年嗰張成績表,同埋銷售可錄得穩定增長,又預期公司毛利率維持喺高過30巴仙水平添!因此,野村續予「掃貨」評級,「他屐」就由約32蚊升至36﹒3銀。
睇番公仔圖,佢14日RSI水平約62,未算「超買」,睇好中海外嘅缸友,估計可在
約29蚊吸入,等到下星期一(26日)派業績,初步上望二月初高位32銀先!
《編者按》本欄搜羅即市傳聞,惟消息未經證實,《經濟通》亦不保證內容之準確性。
【與拍賣官看藝術】常玉作品屢創天價,背後其實藏著跌宕起伏的人生► 即睇