RSS訂閱 魚缸今朝（１８日）高開９１點，報３１０３３點，不過上晝延續企唔穩嘅格局，一度倒跌３７點，未有太大嘅方向。
大家都知石油佬走勢同油價掛勾喇，油價呢排咁勁揪，多次創三年半新高，布油仲突破過
８０美金，唔怪得佢哋今日上晝都繼續有力彈高。
唔單止咁，巴克萊最新仲上調咗今明兩年嘅油價預測喎！話隨住委內瑞拉產量大減，加上花旗國恢復制裁伊朗，石油嘅供應正喺到收緊。將今年布油嘅預估由每桶６１﹒８美金，調升到
７３美金，而出年嘅預測就由６０美金升到去７０美金，可見呢間行對油價幾有信心，石油佬應該可以繼續有運行！
中石油（００８５７）喺「三桶油」之中，今日股價最出位，領漲一眾藍戰士。野村就睇好佢今年嘅表現，調高今明兩年嘅每股盈利，仲將「他屐」由６﹒７３銀上調至７﹒６１銀，仲有唔少水位。石油佬先前一直都跑輸大市，最近就追返唔少，加上前景應該都幾好，缸友不妨等股價回返去６蚊附近掃貨。
《編者按》本欄搜羅即市傳聞，惟消息未經證實，《經濟通》亦不保證內容之準確性。
【你點睇】本港主要銀行跟隨美聯儲減息，你對樓市前景有否信心？► 立即投票
