RSS訂閱 中美貿易戰算係暫時傾掂數，魚缸高開１８４點報３１２３２點，之後升幅更加擴大去到超過４００點，氣氛好，缸友都ｈａｐｐｙ！
阿爺日前就召開咗祖國生態環境保護大會，國家主席習近平就提出要加大力度，推進生態文明建設、解決生態環境問題，仲話要堅決打好污染防治攻堅戰，推動祖國嘅生態文明建設，邁上新台階！而國務院總理李克強亦提出要加強工業、燃煤、機動車「三大污染源」治理，堅決打贏藍天保衛戰咁話。
要講到最受惠嘅魚毛，當然就要數到環保佬喇，而今朝表現相對突出嘅，一定要數到北控水務（００３７１）！呢條魚毛主要就係做污水處理，既然阿爺都話要加大力度，佢就當然開心向上跳喇！若然實際推出更多措施畀著數行業，相信業務更加有力再彈。
睇埋大行睇法，大和就繼續畀個買入評級，目標價６﹒３５銀，而摩通就仲有信心，「他屐」畀咗７﹒５銀，評級增持！依家北控水務現價都只係５蚊左右，如果能夠有國策配合，相信長遠發展都可以保持一定增長，有貨缸友坐穩喇！
《編者按》本欄搜羅即市傳聞，惟消息未經證實，《經濟通》亦不保證內容之準確性。
【與拍賣官看藝術】常玉作品屢創天價，背後其實藏著跌宕起伏的人生► 即睇
