RSS訂閱 雖然呢排貿易戰困擾住缸友，但花旗股市間唔中仲有力破頂，噚日（１２日）因Ｆａｃｅｂｏｏｋ、微軟同亞馬遜等科技股觸及紀錄高位，帶動納指創７８２３點收市新高，花旗三大指數同時上升，香江喺未有特別壞消息出現時，魚缸今朝（１３日）表現亦唔錯。
當然，大家都知道貿易戰邊有咁快打完，為咗提防往後仲有相關嘅消息影響大市，缸友選股方面，可以選擇一Ｄ同本地或神州消費性質嘅相關股。最近周大福（０１９２９）宣布，第一財季神州同店銷售穩定增長４巴仙，港澳方面同店銷售增長２６巴仙。整體而言，公司香江嘅業務表現較神州業務好，因為銷量上，港澳地區增長１３巴仙，零售值增長達２１巴仙，均比神州業務要好。
大和同花旗都出嚟撐公司喎！花旗認為公司數據整體良好，營運邊際利潤亦將會改善。大和則認為平均售價提升，令公司同店銷售上升，而公司喺神州開設嘅新店將成為神州孖屐零售銷售價值增長嘅主要動力，兩間機構都畀咗「掃貨」評級周大福。周大福周息率都逾６厘，而六月時已隨大市自今年高位回落超過２３巴仙，現價都抵買，缸友可以喺９蚊左右放心入市！
《編者按》本欄搜羅即市傳聞，惟消息未經證實，《經濟通》亦不保證內容之準確性。
【你點睇】本港主要銀行跟隨美聯儲減息，你對樓市前景有否信心？► 立即投票
