RSS訂閱 花旗國宣布對神州２０００億美金進口商品徵收１０巴仙關稅，會剔除蘋果公司、Ｆｉｔｂｉｔ等智能手錶、單車頭盔、兒童汽車座椅等消費品，下個禮拜一（２４日）起生效，年底前會將稅率推升到２５巴仙。不過，花旗國總統侵侵（特朗普）警告，如果神州報復，會對額外２６７０億美金嘅貨品開徵關稅，連今次剔出關稅清單嘅產品及ｉＰｈｏｎｅ等都會徵稅。
孖屐似乎早已預期２０００億美金關稅清單遲早出爐，魚虹今朝（１８日）都無出現恐慌性拋售，半日唔見約２００點。雖然清單剔除部分蘋果產品，兩隻手機設備藍戰士依然受壓，瑞聲（０２０１８）唔見２個巴仙，舜宇（０２３８２）就跌超過３個巴仙。
舜宇收入主要來自於手機鏡頭同車載鏡頭，首先，手機孖屐競爭激烈，而作為行業指標，蘋果今年發布嘅新ｉＰｈｏｎｅ預訂量不似預期，加上其高定價策略，銷售必然會受到影響，孖屐關注舜宇鏡頭模組毛利同前景。另一方面，神州經濟下行令同胞買車意慾下降，中汽協公布８月份嘅神州汽車銷量就下降咗接近４個巴仙，加埋人仔貶值等因素，舜宇可以話禍不單行。
不過，舜宇作為行業龍頭，研發水平始終不容置疑，消費者對於手機攝像鏡頭嘅升級需求，預料短期唔會改變，３鏡頭手機將成為市場下半年趨勢，甚至有手機巨頭傳出會用５鏡頭，如此一來，就可抵銷銷量下降對鏡頭出貨量嘅影響。至於車載鏡頭，隨住智能駕駛、無人駕駛未來需求不斷提升，公司憑技術上優勢自然可搶「頭啖湯」。新興領域方面，公司喺虛擬實境同增強現實都仲處喺發展早期階段，可謂潛力巨大。
舜宇喺目前市場氣氛之下，股價難免受壓，要補返公布中期業績之後嘅下跌裂口位（１０２﹒８銀至１２０銀），短線相信難度幾高，但如果睇好公司發展前景，可待舜宇下調至上月低位８３蚊附近時分注低吸博反彈，短線睇１０天線（９１﹒１９銀），跌穿７５蚊就要止蝕。
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
