RSS訂閱 呢期興講「金九銀十」，理應喺砵砵車銷售嘅傳統旺季，惟獨長汽（０２３３３）嘅股價一直走低，主要係業績唔靚仔，ＳＵＶ銷售風光不再。長汽今早（１９日）突然急升，主要係炒主席增持股份而見大幅反彈。
長汽主要經營ＳＵＶ種類嘅開發，並將ＳＵＶ細分為唔同市場，今年上半年成績亦唔及「孖屐」預期。一向主打嘅哈弗品牌銷量繼續走下坡，上半年哈弗系列ＳＵＶ總實現銷量約３２萬架，較上年同期跌近１８巴仙。其中，小型ＳＵＶ哈弗Ｈ１同Ｈ２更加喺同比下滑最多７成，說明咗市場對「哈弗熱潮」經已退卻。與此同時，一直喺長汽旗下「銷量王」嘅哈弗Ｈ６上半年銷售只有近２２萬架，同比走低近４巴仙；寄予厚望嘅哈弗Ｈ７同Ｈ８（大型ＳＵＶ）銷量都同比下降咗七成。
發展新能源「孖屐」睇嚟喺汽車行業唯一嘅出路。跟據８月份嘅數據顯示，新能源砵砵車銷售錄得超過１０萬架，同比增加約４９巴仙。喺今年年初，中汽協對２０１８年度新能源砵砵車銷量嘅預測喺超過１００萬架，以走勢嚟講似乎可以達到。其實今年年頭，祖國已經不斷對新能源砵砵車補貼推出扶助政策，顯然地長汽就ｍｉｓｓ咗大好時機了。
除咗「孖屐」定位嘅問題外，行銷費高企亦成為缸友憂慮嘅因素之一。由於哈弗「愛將」銷量不停走低，長汽近年開始大手賣廣告。據業績公布顯示，上年頭六個月，長汽喺廣告上面嘅花費就已經有近３億銀，而今年上半年相關費用仲高達近２１億銀，同比上升超過３２巴仙，銷售費用進一步侵蝕公司嘅淨利潤。
因應以上嘅相關因素影響，高盛一早就唔睇好佢，畀咗個「掟貨」評級兼將佢嘅「他屐」由５﹒２４銀降至４﹒２銀咁。真喺陰公豬！
睇返個公仔圖，長汽喺舊年１０月創下嘅超過兩年高位１１﹒８７銀後，一直瀡滑梯，上個禮拜二（１１日）跌至３﹒９６銀開始跳吓彈床，累計跌幅大嗱嗱近６７巴仙。跌咁多點都會有勇士撈底博佢技術性反彈，但考慮到長汽銷售成績唔多省鏡，中長線唔係咁博得過，缸友都係唔好繼續高追，趁現價高企食胡離場好過啦。
《編者按》本欄搜羅即市傳聞，惟消息未經證實，《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情
