RSS訂閱 今日魚缸樂歡欣，開市就高開５６４點仲曾經一度升到６００幾點，收復２６０００點關口，點解升得咁多，事源神州習大大同侵侵噚晚傾電話，侵侵話有良好對話，令「孖屐」期待貿易戰有解決方案，魚缸成個十月暴跌，今個月應該有返少少氣色啦掛。
不過又唔好開心得咁早住，博客記得四月嗰陣中美兩國都曾經話傾掂數，不過最後點就大家有目共睹，喺冇實際政策落實之下都係不宜樂觀。其實打貿戰都可以有魚毛受惠，例如九月開始強勢嘅嘉里物流（００６３６）就係其中之一喇，九月嘅時侯就創過近五年新高１３﹒３４銀。
睇返盤數先，嘉里物流中期業績好過預期，期內收入按年增長２７巴仙至１７４億銀；純利增長兩成至９﹒４８億銀。由於集團全球性嘅業務佈局，比較少受到中美貿易戰影響，當中東南亞市場嘅物流業務顯著增長，泰國業務仲係主要增長動力，去年盈利增長逾倍，今年派特別息１２港仙，而且全年派息保持穩定，料維持３０巴仙嘅派息比率。
博客記得幾個星期前，花旗國多隻藍戰士公布業績時都話會考慮將生產線撤出神州，而且就算唔係貿易戰，近年喺神州設廠嘅成本大增，「世界工廠」嘅地位就嚟畀人取代。前幾日神州公布嘅官方ＰＭＩ降至５０﹒２巴仙遜預期，跌至逾兩年新低，已經反映製造業同進出口不景氣嘅現象，所以君不見神州已經轉口風講「中國製造２０３５」呢！
嘉里物流早前就同泰國大眾運輸系統ＢＴＳ Ｓｋｙｔｒａｉｎ完成交易，ＢＴＳ入股後，除咗令公司有現金回流，喺捷運系統運送貨物上成本仲可以降低４０巴仙，而當集團嘅營運成本下降，可以降低集團嘅運送價格，從而導致增加貨運量，現時泰國嘅貨運量已經上升約三成，而且講明會進一步擴大東南亞業務嘅規模同東盟國家「孖屐」嘅地位，預料可以繼續成為未來盈利增長嘅動力。
睇返公仔圖，近日股價都係處於橫行整固局面，加上前排炒「港珠澳大橋」通車，上過１３蚊後開始回落。事實上，該股走勢相當硬淨，貿易戰對佢股價嘅衝擊輕微，喺第三季都累計彈起一成半，萬一「中美和談」都只係一場虛火，入市吸納都唔駛太驚，同埋如果對未來東南亞物流發展有信心，可以考慮現價買入，但如果跌穿近個幾月嘅橫行區間底部１２﹒１６銀就要走人喇。
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
