RSS訂閱 今日魚缸承接唔到上日升勢，一開市已經低開４００幾點，其後跌幅大為擴大，仲失守埋二萬六關口，話上星期嘅升勢係一場虛火似乎都唔過份啊！
其實魚缸由年頭高位到依加已經唔見二成幾，高低波幅達８０００幾點，好多藍戰士自高位跌咗唔少，所以如果真係搵貨買，就梗係搵啲輸少當贏嘅股啦？
好似長建（０１０３８）咁，股價自高位雖然都回落唔少，不過睇返公仔圖啊，長建由５月穿６０蚊後都算穩打穩紮，開始一直處於橫行區，喺６３蚊明顯見阻力，但每次觸及５６蚊左右嘅位置就會有支持，呢個底似乎都幾難穿，如果現價買一手到６０蚊樓上位置沾貨，缸友們都可以執幾舊水啊。
長遠去睇，長建依賴收購合併去支持營利增長，小超（李澤鉅）上星期見記者，就話市況波動，可以為基建業務帶來併購機會，所以睇嚟我哋可以留意吓小超幾時又出手啦！
其實前排長建、長實（０１１１３）同電能（００００６）組成嘅財團已經收購咗袋鼠國天然氣管線公司ＡＰＡ集團嘅業務，營利應該會有上行嘅空間，加上長建早前放風話會分拆米字國基建資產喺倫敦上市，如果成事對長建估值都會有幫助。
大和之前就話長建有八成嘅收入嚟自米字國同袋鼠國嘅水電同燃氣資產，相關資產受價格管制，但價格同通脹掛鈎，喺撇除收購袋鼠國ＡＰＡ集團嘅交易，長建嘅預測市盈率會係１３倍左右，屬行業最低，所以推佢為行業首選。另外呢年處於弱勢嘅英鎊一直受脫歐影響而貶值，間接拖低長建業績，但隨住脫歐談判愈來愈明朗化，英鎊應該可以止跌，變相可以帶動長建營收。
現時長建息率較花旗十年債息高出接近１厘，股息率大概有４﹒１２厘，加上長建每年豪爽加派息，就算現價買入收息都唔錯啊！
《編者按》本欄搜羅即市傳聞，惟消息未經證實，《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情
