RSS訂閱 話說今年初醫生股希瑪眼科（０３３０９）夾住馬化騰光環上市，當時公開超購千五倍，首掛就大升８成，之後由上市價２﹒９銀炒到去歷史新高１９﹒９銀，散戶去年真係發夢都係度偷偷笑。
但係，高位接貨嘅就慘囉，呢一年基本上都係由高位一路向下咁派貨，幾乎無咩位反彈過，應該有唔少散戶蟹好耐都走唔到。今年８月派中期業績，純利跌五成幾之後股價再尋底，最近重見過歷史新低３﹒２銀。當大家都以為佢應該接近一隻炒完嘅死股之際，就突然出現一線生機！
自１１月１日開始，醫生股唔知點解價量齊升，而且打開裂口，今日（６日）重爆升兩成幾，睇返資料原來北水南下抄底，港股通佔比明顯上升，持股比例由９月底時０﹒０６％水平，升至噚日（５日）０﹒１８％，北水突然南下炒高，一定有古怪！
睇返恒指走勢，１１月１日恒指飆４００點，醫生股就急急升，之後１１月２日恒指就狂彈千點，反而斃隻股就現陰燭回落，今日跌市佢就逆升，似乎有內地春江鴨，各跡象都顯示呢隻股份應該唔止炒幾日貨仔！
但老實啦，呢類股暫時都唔係好見業績，都係叫炒股，謹記要ｓｅｔ好止蝕，目前現價追略貴，未來幾日有機會回一回到４蚊左右再入未遲，至於幾時走就要配合成交，第一關可先睇７蚊，但如果升到呢個位重見到價量齊升，就有機會係大戶派貨，到時記得走快兩步啦！玩呢隻股嘅缸友記得要睇到實一實。
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》講述被情緒困擾真實個案，情緒病最終如何走出低谷？► 即睇
