RSS訂閱 呢幾日幾隻砵砵車陸陸續續公布１０月銷售數據，其中最靚仔係長汽（０２３３３）１０月銷量按月升兩成七至１１萬架車，刺激噚日（８日）股價造好，不過「同車唔同命」，吉利（００１７５）銷量就麻麻，連日畀大行削價，不過其實吉利上年成績咁好，基於基數效應，今年增幅收窄其實都合理啊。
汽車股近排都處於劣勢，壞消息頻生。根據全國乘聯會數據顯示，神州乘用車銷量連續第五個月下滑，中金話神州１０月乘用車批發、零售銷量同比降幅仍喺１０巴仙以上。
所以汽車股可能都仲有排跌。不過另一邊廂嘅汽車經銷股就可能已經尋底部署反彈，其中永達汽車（０３６６９）自公布業績之後，股價就一直插水，睇返公仔圖啊，現時永達喺上星期四（１日）已經見過近兩年新低（４﹒１１銀），而現時開始漸漸出現技術反彈，收復１０天線（４﹒３５３銀）嘅位置，睇埋ＲＳＩ（相對強弱指標）現時仍然喺３０左右位置，反映佢仍然屬超賣水平，缸友們可以考慮現價小注買入，博佢再反彈。而且永達本身除咗銷售寶馬、捷豹路虎等嘅豪華品牌，未來亦考慮同加入平治同凌志等嘅品牌，如果傾得成事對永達都會有幫助啊，但如果嚟緊股價穿兩年低位，就要識沽貨走人喇。
想睇長遠一啲嘅缸友，亦唔使咁灰心，從基本面因素去睇，其實現時汽車股同汽車經銷股兩個板塊都唔係完全劣勢一面倒，好似中央之前都講過會出手降稅，令引擎唔大於１﹒６公升嘅砵砵車可以平啲，而且有分析仲話，如果汽車購置稅效果唔理想嘅話，可能會進一步刺激農村換車嘅需求，所以缸友們都可以留意吓呢方面嘅消息啊。
《編者按》本欄搜羅即市傳聞，惟消息未經證實，《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情
