RSS訂閱 話說近期內地車企腹背受敵，除咗特斯拉來華「分一杯羹」之外，神州又減咗汽車購置稅，外地汽車吸引力自然加大，國產車真係搵啖粥水食都難。但買股票永遠都有危就有機，人棄我取，係咪咁講先？
吉利（００１７５）近期因為１２月銷售數據大跌，加上大行一齊唱淡，股價差小小跌落去個位數；但今日阿爺一句話未來會出新規話推汽車銷售，車股今日立即飛起晒。
其實，社會主義偉大嘅地方，在於阿爺可以搵到任何方法對社會進行規管，就算畀過江龍入到神州，阿爺都有方法令到佢「守下規矩」，所以一切都要等貿易戰定下來就好辦。而吉利本身就有習大大罩住，輸極都有限，加上大行一齊削價，可能轉個手又靜雞雞自己掃貨，反而目前係一個買入機會，但要耐心靜候下。
另外，有傳吉利最近會進行新一輪架構重組，裁人折衣縮食就梗啦！但聽聞會力谷旗下三隻牌子，即管睇下佢有咩搞作都好！吉利尋日（８日）低見１０﹒０８銀，相信短期內都好難跌穿１０銀關口，除非又有負面消息公布，否則１０銀係一個幾唔錯嘅收貨位，缸友可以ｓｅｔ好目標價，一見位就掃，預料未來幾個月都橫行格局，催化劑就係等阿爺個新規詳細內容。
但如果股份失守買入價１０％（約９銀），就要好離場啦！
《編者按》本欄搜羅即市傳聞，惟消息未經證實，《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情
