RSS訂閱 聯儲局主席鮑威爾又再放鴿，刺激花旗國嗰邊再漲，連升五日，不過香江呢邊似乎消化完中美關係明朗化之後，就再次回歸悶局，但暫時都仲叫企穩喺百天線之上，都算係咁啦！
中美會談前排結束，雖然就無咩具體細節公布，不過有消息就話神州會加大採購花旗國嘅商品同服務，當中農產品係當中嘅主力購入部分，隨住中美關係好轉，之前受貿易戰影響嘅一啲魚毛近排都有啲反彈，好似豬肉佬萬洲國際（００２８８）就已經連升第六日，累計升咗成一成半表現真係十分強勢啊！
其實萬洲早年就收購咗位於花旗國、全球最大嘅豬肉及加工食品商Ｓｍｉｔｈｆｉｅｌｄ Ｆｏｏｄｓ，所以之前中美關係攪到熱烘烘嗰陣，加上業績麻麻，股價喺去年年中狂跌，不過隨住中美關係有明朗化嘅跡象，喺花旗國嘅業務，應該可以帶動返業績造好啦！
加上近排神州開始鬧豬瘟，萬洲喺花旗國嘅業務可能可以分散「神州豬瘟」嘅風險，另外大家都開始擔心肉價會因為豬瘟而上漲，喺呢啲因素下萬洲業務可以睇高一線。高佬最新嘅研究報告都撐佢，預期萬洲第四季喺神州嘅利潤會穩定增長，花旗國業務利潤增長亦會持續改善。雖然預計第四季經營利潤仍要按年跌２９巴仙，但跌幅較第三季會收窄。而隨著中美貿易戰緩和及墨西哥取消關稅，預計花旗國上游業務利潤會逐步復甦，估計生豬虧損收窄，及屠宰場效率提升，可以提振佢全年利潤回升３０巴仙。
以現價計，萬洲市盈率大概１０倍到１１倍，估值吸引力，睇埋公仔圖近似乎想試試收復上年１１月高位６﹒５７銀嘅位置，現時佢已經收復晒所有主要平均線，建議缸友可以考慮喺股價回落到６﹒２銀吸納，進取者現價（６﹒５銀）買入亦無妨，目標價返上年六月第二個下跌裂口底部７﹒２銀嘅位置，但如果未來股價跌到５﹒６銀就要識走人喇！
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
