RSS訂閱 噚日魚缸喺ＱＱ（００７００）同神州磚頭佬帶傾下，以全日高位２９４０９收市，今日亦都創咗近９個月新高。之後雖然回歸靜局，不過總算企穩喺二萬九關，缸友們都應該有唔少斬獲啦！
近幾日神州磚頭佬可以話十分強勢啊！噚日下晝隻碧桂園（０２００７）公布完業績，去年多賺近三成三之後，今日已經畀幾間大行上調「他屐」，今日股價已經坐火箭上返去１２蚊關口，係上年十月以嚟首次，不過博客今日就唔係推介神州磚頭佬。
缸友可能都會問點解，其實一來因為月頭兩會先重新講會推房產稅，二來係幾隻神州磚頭佬嘅上個月銷售數據都唔係隻隻好，所以喺同樣炒業績下，博客反而想講下啲物管佬，事關幾隻物管佬都先後發盈喜。其中，中海外（００６８８）嘅姊妹公司中海物業（０２６６９）就會喺今日公布業績，就咁睇公仔圖同基本面都幾值得缸友細細注博一鋪。
＊密密收購多個項目，料可帶嚟唔少收益＊
睇返上年盤數先，嚿年中期佢嘅純利就咗升近３９巴仙到２﹒２１億銀，期內，物業管理服務收益亦按年升近１９巴仙至１７﹒７２億銀，成績交足功課。而且中海物業都密密收購無停手，上年１１月集團就向中海外若干附屬，以逾２億銀收購喺神州約１２０項物業管理合約。當中包括３１０１個停車位的使用權，同重慶中海國際社區國際商廈全層寫字樓嘅房屋產權，預計可以為中海物業帶嚟唔少收益。
今個月大和都話以中海物業國企嘅形象，公司有能力繼續增加規模，列佢為行業首選，重申佢「買貨」投資評級同「他屐」３﹒１銀，相比現時股價都差唔多到價，可見佢幾強勢呢！
睇埋公仔圖，股價比魚缸反彈得更早，由上年１１月近１﹒７銀嘅位置，依加已經彈到３蚊嘅位置，所以缸友不妨喺今日睇下份業績，如果業績勝預期，都可以快快手不問價買入，因為以之前幾隻物管佬公布業績之後嘅走勢嚟睇都仲有水位賺！
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
