RSS訂閱 呢兩日遊戲界乃至科技界嘅大新聞，就係Ｇｏｏｇｌｅ公布新發明「Ｓｔａｄｉａ」。有咩咁把砲？把砲在以後用戶打機唔需要再砌部勁機，唔需要再等佢下載完先玩得，玩家只要有部簡單電腦可以上網（最少２５ｍｂ寬頻），有滑鼠有鍵盤，透過Ｃｈｒｏｍｅ瀏覽器就可以直接喺Ｇｏｏｇｌｅ嘅雲端入面直接遊玩。
大家可能重停留喺「雲端只係用嚟儲存」嘅概念。事實上，雲端除咗儲存，重有運算功能，科技界未來發展，就係利用雲端服務喺線上解決一切需要大量運算嘅工作，例如繪圖、遊戲、挖虛擬貨幣等，未來人類電腦可以省卻主機，只需要有鍵盤滑鼠螢光幕就可以。
博客講咁耐，其實都係想帶出，神州「孖屐」係有無限想像空間，但自從Ｇｏｏｇｌｅ退出神州「孖屐」之後，要再入返去都有難度，而業界一路都鬥緊相關技術，網頁遊戲１０年前都有，而現在只係鬥硬件上邊個快手。目前喺神州科企之中，做遊戲同時又做雲端而且大型公司得兩間，一間係ＱＱ（００７００），一間就係金山軟件（０３８８８）。
唔講唔知，原來好多缸友都唔知金軟係有做遊戲，而且成為公司一個重要收入來源之一。雷老師（雷軍）一路都將金軟嘅發展同小米（０１８１０）結合嘅，遊戲就係其中一個重要業務，雖然雲業務佔金軟收入唔多，但業界已經推出雲遊戲，相信神州科企要追並唔難，而神州遊戲業屬寡頭壟斷情況，外企根本連插針機會都無，所以係獨市生意。
近期中金都出份報告，維持金軟「他屐」２１銀同評級「買入」不變，主要因為雲業務增長強勁，公司遊戲儲存量足夠，包括《劍網３》、《少女咖啡槍ＩＩ》、《最終幻想：勇氣啟示錄》和《卧龍吟》。而ＱＱ今日（２１日）就會放榜，相信對金軟股價有正面刺激作用。
睇返近期走勢，金軟喺今年１月起開始進入上升通道，短期支持位會係１５﹒５銀左右，如果缸友有興趣可以分注入貨，回吐就可以分注溝入，等佢２６日公布業績之後可以長揸，事關佢遊戲收入都算穩定，第一關可以先睇２０銀，到站先食胡一半，留一半等佢破新高啦！
《編者按》本欄搜羅即市傳聞，惟消息未經證實，《經濟通》亦不保證內容之準確性。
【與拍賣官看藝術】常玉作品屢創天價，背後其實藏著跌宕起伏的人生► 即睇
