香江魚缸今早表現都幾反覆,傳統股明顯有炒作,相反最近熱炒股就要偏軟。呢個市況之下,博客就覺得可以部署一啲中長線同穩固嘅板塊,當中光伏板塊值得部署,可以留意暫時回吐幅度最強嘅新特能源(01799)!
公司主要業務就係做多晶硅生產,同向神州太陽能同風能發電廠與系統提供工程建設承包服務。而早前神州已係「十四五」規劃入面提過大力發展綠色能源,而最新都有國務院發布,有關加快建立健全綠色低碳循環發展經濟體系意見。當中提到至2035年,綠色發展內生動力要大力增強,實行提升可再生能源利用比例,大力推動風電、光伏發電發展,明顯利好公司業務。
其實博客一直都覺得光伏股有好大發展前景,睇好行業中至長線發展,不過相關股份近半年炒作都比較大,會想等佢股份穩定一啲,回調返小小先考慮吸納,咁樣買股之後嘅下挫風險亦相對減少。睇返公仔圖,自從佢係舊年12月尾一路爆升到1月尾高位後,就反覆係22蚊到31蚊位置波動,已經持續大約一個月時間,反映出股價已於該水平整固,相信之後有機會再發力升上!
加上睇埋佢地RSI水平已回復到約50點水平,已經消化早前超買情緒,或者都代表現時係一個入貨時機啦!新特能源今日股價暫時回調到24蚊水平,博客就覺得佢會再回調少少到22蚊,不過現價仍然可以吸一小注博反彈,之後可再逐級部署。目標價先定30蚊再作觀望,跌穿20蚊走人。
《編者按》本欄搜羅即市傳聞,惟消息未經證實,《經濟通》亦不保證內容之準確性。
【你點睇】美眾院通過法案,香港駐美經貿辦恐遭關閉,你是否支持中方對此作出強烈反制?► 立即投票