RSS訂閱 阿爺近期頻頻出口又出手，勢要托返起成個經濟，所以魚缸呢排都係冒住風雨嚟前進。雖然魚缸近期走勢有改善，不過就算升都仲要睇住企唔企得穩21000，如果過唔到呢關，整體呢兩個月都係維持緊一浪低過一浪，唔太利好投資信心。
不過講到尾，魚缸都唔會同阿爺唱反調，只要有阿爺關照嘅行業，後市差極都有個譜。之前上面就話過要積極鼓勵綠色家電同新能源車下鄉，最近終於有詳細內容望吓，據《中證網》引述消息，汽車下鄉政策有望喺6月初出台，鼓勵車型15萬人仔以下嘅汽車（包括燃油車同新能源車），每架車補貼範圍大概3000至5000人仔。
終於有措施出台比起領導人講兩句嚟得實在，睇到點鼓勵法比起齋炒消息都有信心得多。博客睇到隻比亞迪(01211)走勢幾靚，噚日升差唔多7%之後，一舉突破橫行區間，仲過埋牛熊線，而日線圖書MACD牛差都係擴闊，技術面大旺。博客建議有信心嘅話現價追入都不為過，不過謹慎啲就可以等回落返牛熊線，大概244至245銀先入會比較好，目標可以睇住280銀先。不過比亞迪一手入場費都唔少，想小注博嘅不妨揀打靶位遠少少嘅牛證，咁操作上都容易啲！
《編者按》本欄搜羅即市傳聞，惟消息未經證實，《經濟通》亦不保證內容之準確性。
【你點睇】美眾院通過法案，香港駐美經貿辦恐遭關閉，你是否支持中方對此作出強烈反制？► 立即投票
