RSS訂閱 噚日（１９日）魚缸打烊後，香港電視（０１１３７）主席王維基率領５０同事，齊齊玩「冰淋城下」，亦即係現時網上最ｈｉｔ嘅「自殺式淋冰水」遊戲。
遊戲好簡單，畀人點名挑戰後，就要喺２４個鐘內，拎盤冰水兜頭淋，借此去體會「漸凍人」病患者嘅感受，除勸捐外，更可再選３個人去挑戰倣效，延續宣揚善事。
本嚟魔童王維基兜頭淋完冰水，並捐５０００美金，本應隨即散場，但點知佢事後竟率領半百員工，向「對香港電視『恩重如山』嘅經發局局長蘇錦樑」挑機！點知，今早（２０日）蘇局長借社交平台宣布應約，仲稱帶「神秘嘉賓」出席，即時令花生指數飆升。
今午，政總數十記者嚴陣以待，估唔到蘇局長勁有「飛士」，搵嚟海洋公園前主席盛智文陪同一齊「玩命」。淋冰水後，雖然髮型崩塌（光頭的盛智文除外），但各人表現興奮，隨即宣布向ＡＬＳ捐助１００美元外，再斥１萬銀捐兩相關議題團體，總算換得一場樂事。
事後，蘇局長宣布向金句天王黎明、旅發局主席林建岳、以及蔣麗萍（若佢無講錯，佢係指蔣麗芸議員嘅胞妹）挑機。
雖然蘇局長肯做「找數真漢子」，喺２４小時內接受挑機，但佢對香港電視不獲發免費電視牌照一事，冀王維基不要「放在心中」，相信盈盈同廣大巿民一樣，對蘇局長嘅善心都會「放在心中」！《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
【與拍賣官看藝術】常玉作品屢創天價，背後其實藏著跌宕起伏的人生► 即睇
