RSS訂閱 香江依家雖然提供１２年免費教育，又有學券，大學又有津貼，但一年仲係要俾成四萬二，花旗國最近開咗間大學叫做４２，居然唔使收學費！
４２創於法國，呢個名源自科幻小說《銀河便車指南》，呢間「三無」大學相當特別，因為無教授、無課程同埋無學費！間大學主要係學寫程式同埋開發軟件，由學生之間合作做
Ｐｒｏｊｅｃｔｓ之後互改同評分。雖然無教授，又無學位文憑，但畢業生出嚟社會後嘅出路都唔錯，入ＩＢＭ、亞馬遜同特斯拉嘅大有人在，而且評價仲相當唔錯，會自動波搵資料同識得做下一步工作，唔似一般畢業生淨係識問上司之後點做。
４２收生唔睇中學成績，雖然法國間４２有四成學生連高中畢業程度都無，但並唔係人人都啱讀呢間大學，只有高度自律、會積極主動學習同有能力掌握學習節奏嘅人先適合。
盈盈覺得呢個模式同Ｄ網上課程幾似，但多咗好多同學間交流同合作，正正可以鍛鍊到喺社會生存嘅技巧。但可惜呢個模式未必可以做大，因為未必有太多人適應到，特別係香江，喺大學度睇吓有幾多學生坐晒喺Ｈａｌｌ或者課室最後嗰排，甚至走堂，就知依家大學生有幾咁積極主動。《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
【你點睇】美眾院通過法案，香港駐美經貿辦恐遭關閉，你是否支持中方對此作出強烈反制？► 立即投票
