《笑傲缸湖》揭曉荷里活十大片酬過高演員，邊位影帝也中槍？

　　相信唔少打工仔同盈盈一樣，周末放假實去睇返套戲ｒｅｌａｘ吓，總覺得沉醉喺電影嘅世界可以暫時忘卻現實中嘅煩憂。講起盈盈最愛嘅電影，就不得不提《鐵達尼號》、《摘星奇緣》，兩套戲嘅主角里安納度狄卡比奧、茱莉亞羅拔絲迷倒不少男女，但你又點諗到佢哋都係「貴非所值」嘅另類票房「毒藥」呢？！
　　《福布斯》早日選出２０１６年十大片酬過高演員，狄卡比奧排第８，佢每收１蚊（美金．下同）片酬，票房回報只有９﹒９銀。奇怪喇，狄卡比奧貴為新任奧斯卡影帝，代表作《華爾街狼人》、《潛行凶間》唔係賣到開巷咩？原來係因為佢本身片酬係天文數字，作品製作費驚人，好似《復仇勇者》使咗１﹒３５億，就算票房有５﹒３３億，回報率計落自然低啦！
　　其餘入選嘅亦粒粒皆星，真係估佢唔到。《賤熊３０》麥克華堡、《盜海豪情》佐治古尼、《黑超特警組》韋史密夫等等都無一倖免！而茱莉亞羅拔絲迷就係名單中惟一女星，《福布斯》話佢收嘅片酬其實比上述男演員低好多，但今年上畫嘅《幸福百分百》收益太慘不忍睹。
　　而「毒藥」之王嘅寶座眾望所歸，連續兩年屬於尊尼特普。主演嘅《愛麗絲夢遊仙境２：穿越魔鏡》預算１﹒７億，票房卻３億都唔夠，令佢片酬每收１蚊只係得２﹒８銀回報！再加上早排傳出涉及毆打前妻，形象插水，睇怕下年都非佢莫屬。《任盈盈》

　《福布斯》２０１６年十大片酬過高演員排行榜：
－－－－－－－－－－－－－－－－－－－－－－－－－－－－－－－－－－－－－－－－－－
　　　演員：　　　　　　　　　回報（每１美元片酬計）　　　代表作

　１﹒尊尼特普　　　　　　　　　　　２﹒８美元　　　　　《魔盜王》
　　　（Ｊｏｈｎｎｙ　Ｄｅｐｐ）
　２﹒韋史密夫　　　　　　　　　　　５﹒０美元　　　　　《黑超特警組》
　　　（Ｗｉｌｌ　Ｓｍｉｔｈ）
　３﹒卓寧泰坦　　　　　　　　　　　６﹒０美元　　　　　《舞出真我》
　　　（Ｃｈａｎｎｉｎｇ　Ｔａｔｕｍ）
　４﹒韋費路　　　　　　　　　　　　６﹒５美元　　　　　《名模大間諜》
　　　（Ｗｉｌｌ　Ｆｅｒｒｅｌｌ）
　５﹒佐治古尼　　　　　　　　　　　６﹒７美元　　　　　《盜海豪情》
　　　（Ｇｅｏｒｇｅ　Ｃｌｏｏｎｅｙ）
　６﹒阿當桑迪拿　　　　　　　　　　７﹒６美元　　　　　《命運自選台》
　　　（Ａｄａｍ　Ｓａｎｄｌｅｒ）
　７﹒麥克華堡　　　　　　　　　　　９﹒２美元　　　　　《賤熊３０》
　　　（Ｍａｒｋ　Ｗａｈｌｂｅｒｇ）
　８﹒里安納度狄卡比奧　　　　　　　９﹒９美元　　　　　《華爾街狼人》、《潛行凶間》
　　　（Ｌｅｏｎａｒｄｏ　ＤｉＣａｐｒｉｏ）
　９﹒茱莉亞羅拔絲　　　　　　　　１０﹒８美元　　　　　《摘星奇緣》、《風月俏佳人》
　　　（Ｊｕｌｉａ　Ｒｏｂｅｒｔｓ）
１０﹒畢列谷巴　　　　　　　　　　１２﹒１美元　　　　　《醉爆伴郎團》
　　　（Ｂｒａｄｌｅｙ　Ｃｏｏｐｅｒ）
－－－－－－－－－－－－－－－－－－－－－－－－－－－－－－－－－－－－－－－－－－

　　《編者按》本欄搜羅即市傳聞，惟消息未經證實，《經濟通》亦不保證內容之準確性。