RSS訂閱 香江魚缸已經進入業績期，部分本地錢莊東亞（０００２３）、大象（００００５）、恒生（０００１１）都相繼派咗成績表，可惜都令人跌晒眼鏡，股價齊齊向下碌。而今朝（２４日）放榜嘅ＡＩＡ（０１２９９），總算無令缸友失望，全年新業務價值增２８巴仙，勝預期，雖然野村就覺得ＡＩＡ升太多，予中性評級及目標價５２﹒８６銀，搞到ＡＩＡ今朝去到５０蚊大關就調頭倒跌，不過大摩同摩通就繼續看好，分別望６０蚊同６５蚊。正所謂有危就有機，ＡＩＡ唞唞氣回番ＤＤ，不妨喺十天線（約４８﹒３７銀）低吸等開車喇！
仲有渣打（０２８８８）都係今日放榜，根據往常做法，通常都喺收市後派成績。瑞信就睇得頗淡，話雖然全年虧損會大幅收窄，但係第四季應該會按季轉虧２﹒５億美金，繼續睇「遜於大市」評級，目標價只值５０蚊。
其實根據外電綜合券商評級，基本上逾四成六券商都係畀「沽售」評級，平均目標價都只係６３﹒８５銀，比現價約７３銀仲有逾一成潛在跌幅，有貨缸友都係走人好過吧。
《編者按》本欄搜羅即市傳聞，惟消息未經證實，《經濟通》亦不保證內容之準確性。
【你點睇】美眾院通過法案，香港駐美經貿辦恐遭關閉，你是否支持中方對此作出強烈反制？► 立即投票
