RSS訂閱 股王ＱＱ（００７００）破頂之路雖然暫時告一段落，噚日（２４日）仲要畀人係咁掟貨曾拖累魚缸唔見百幾點，但缸友都深知單靠ＱＱ，魚缸唔會去得盡，所以今朝（２５日）缸友嗱嗱臨轉炒神州磚頭佬，破頂常客「四條三」恒大（０３３３３）已經去到１２﹒４６銀插旗，仲要連續五日成功登頂，缸友應該好慶幸自己冇摸頂。兩隻神州磚頭藍戰士潤地
（０１１０９）同中海外（００６８８）都好巴閉，潤地仲要畀中金唱好，兩隻都升咗超過３巴仙，貢獻魚缸升幅不遺餘力。
眾多藍戰士入面，聯想（００９９２）好多時都喺名列前茅，只不過喺落後嗰隻。聯想今年四月一度上返５蚊關，最高去到５﹒４銀，正當唔少缸友都好期待會繼續上升之際，聯想竟然碌返落嚟，即使魚缸上二萬五千五又創２２個月新高，聯想依然逆市而行，仲要失守埋唔少條平均線，真叫缸友情何以堪。
而佢阿媽聯想控股（０３３９６）雖然對比兩年前招股價４２﹒９８銀仲喺潛緊水，但今年計都升咗超過三成，而聯想就半成都冇。聯想近年成績唔喺太好睇，因為要整合手機業務，舊年蝕咗成億美金，今年首季喺全球手提電腦嘅龍頭地位仲要比勁敵惠普搶埋，屆居第二位。
不過，彭博綜合分析師嘅預測，今年扭虧為盈，賺５億美金左右，而聯想會喺今日晏晝放榜，業績有驚喜嘅話分分鐘可以彈高唔少，有望上返５蚊關之餘仲有機挑戰５﹒４銀以上高位。相反，如果成績唔及預期，都可以等股價跌完再撈底。聯想依家１４天ＲＳＩ都喺４２左右，股價咁殘值得望多幾眼。
《編者按》本欄搜羅即市傳聞，惟消息未經證實，《經濟通》亦不保證內容之準確性。
【你點睇】美眾院通過法案，香港駐美經貿辦恐遭關閉，你是否支持中方對此作出強烈反制？► 立即投票
