RSS訂閱 默克爾成功連任，呢Ｄ政治大事終於唔再爆冷，但祖國西安重慶等多地樓市調控，令內地磚頭心荒荒，魚缸亦跟住向下沉。
中興通訊（００７６３）今朝逆風向前行，試過衝前超過６巴仙高見２６﹒５銀創新高，都幾堅。事關佢獲麥格理升目標價，由２２蚊升到去２８蚊，重申「跑贏大市」評級，睇好佢將業務拓展到去歐洲市場，同埋喺內地推動５Ｇ可能快過預期，另外搞智能手機嘅策略係賺錢為先，麥格理好ｂｕｙ佢發展方針，上調埋今年至２０１９年盈測添。
三大中資電訊股都係中興通訊客仔，仲食正４Ｇ升級到５Ｇ嘅時機，基本面無得輸，除咗發展歐洲業務外，公司仲喉住好多發展中國家，印度同印尼等等都有業務，發展潛力不容忽視，今朝跌３百幾點都照破頂，而且有成交配合，相信強勢將會持續，但小心１４天ＲＳＩ已經好接近８０（目前７８﹒６），短線見回吐都唔出奇，較保守嘅缸友有貨減持多少都ＯＫ，等回再入番貨，但相信中線仲未到頂。
《編者按》本欄搜羅即市傳聞，惟消息未經證實，《經濟通》亦不保證內容之準確性。
【你點睇】美眾院通過法案，香港駐美經貿辦恐遭關閉，你是否支持中方對此作出強烈反制？► 立即投票
