RSS訂閱 股王ＱＱ（００７００）手遊《光榮使命》今日（２１日）上線，股價早段曾一度爆升至４３９﹒６銀嘅新高位，市值破埋四萬億銀大關，大行花旗仲畀「最牛他屐」６０６銀添，仲有貨嘅缸友或將下一個目標推高至４５０蚊！
在ＱＱ強勁升勢兼再破頂之下，大市成交亦能配合，今日魚缸曾剷高近４００點報
２９６５２，再創出２００７年１２月以來的高位喇，真係恭喜晒一眾「大好友」！目前熊證街貨重貨區暫時喺２９７００點至２９７９９點之間，等博客留名，睇下等下晝會唔會殺上去「屠熊」喇！
北水持續湧入，除咗ＱＱ外，仲有呢隻平保（０２３１８），佢噚日仲成為北水「淨掃貨」最多嘅成交活躍股仔添，足足成９﹒９８億銀之多，可見水源非常充足。
平保之所以升得咁勁，有傳係個孖屐翻炒返旗下網上金融平台「陸金所」分拆上市嘅概念，除咗呢個熾熱消息外，大和話，佢嗰五大金融科技嘅應用當中，將有助開拓客戶服務、同埋風險管理等等嘅業務；此外，野村就調高對佢喺２０１８年至２０１９財年新業務價值增長預測，共增至２３至２６個巴仙。相信佢不斷擴大嘅業務，可推高佢喺未來一兩年嘅業績喇！
睇番公仔圖，目前暫時最高見８４﹒２０銀，博客估計，呢個價仲未可以見追上佢正在發展嘅業務，相信仍有力可衝上「紅底他屐」１００銀！
《編者按》本欄搜羅即市傳聞，惟消息未經證實，《經濟通》亦不保證內容之準確性。
樂本健【秋日開倉26 - 27/9】保健品低至$20！► 火速行動
