RSS訂閱 神州砵砵車一向都想走向國際、打入花旗國「孖屐」啦，貪佢人均汽車擁有量高，加上消費能力相對較強。不過。廣汽（０２２３８）旗下品牌傳祺（Ｔｒｕｍｐｃｈｉ）要踏出第一步，就要能比其他品牌更難，皆因佢嘅英文譯名同花旗國總統侵侵（Ｄｏｎａｌｄ
Ｔｒｕｍｐ）個姓氏有幾番相似，依點對於希望打入花旗國，就唔敢肯定是福還是禍啦！
廣汽總經理馮興亞就強調「撞名」純屬巧合，指出「Ｔｒｕｍｐｃｈｉ」只係普通嘅音譯，並無包含任何特別意思。而「傳祺」原本個意思都幾有詩意，代表「傳遞美好嘅祝願」。
雖然話個譯名幾年前已經出現，而侵侵係喺之後先當選總統，不過廣汽都無喺呢個問題上企硬。馮興亞就話集團依家都有著手研究緊，包括若品牌名同當地領導人個名接近嘅話，會唔會有法律上嘅問題，同埋話如果有需要，會揀個花旗國消費者感覺上舒服啲嘅名，都算係幾有誠意。
查實唔使盈盈講到出口，大家都知道廣汽係怕侵侵個名會趕客啦，不過都唔係全個花旗國都唔ｌｉｋｅ佢嘅，話唔定侵侵口嘅粉絲團，反而會因為呢個名而買車呢？但始終個名都只不過係個稱呼啫，與其花時間去諗改咩名，不如度下橋點樣打贏啲日產砵砵車先啦！《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
樂本健【秋日開倉26 - 27/9】保健品低至$20！► 火速行動
