RSS訂閱 中美貿易戰最終都要開打，花旗國總統侵侵簽咗正式文件，而阿爺隨即就回應話會報復，搞到花旗國魚缸全線向下，道指更插超過７００點。香江呢邊都跟住跌，低開逾千點，報２９９３０點，依家上返些少，約３０２００點水平。
既然魚缸都急挫得咁勁，又未知道幾時先跌完，博客目前都無謂叫缸友們撈底喇，不如講下應該沽咩喇。眾安在綫（０６０６０）雖然上市初期聯同閱文（００７７２）、易鑫
（０２８５８）等股份，有個叫個「新經濟明星半新股」嘅朵，不過佢呢排嘅表現都真係有違呢個名喇。全因為自從佢前兩日放完榜之後，股價就再向下，連續幾日見上市新低喇。
雖然大家一開始都睇好眾安嘅互聯網保險業務，不過由成績表所見，表現真係認真嘛嘛，由盈轉虧蝕咗接近１０億元人幣，２０１６年同期係賺９３７萬人幣，即使總保費收入有增加都無咩用喇。
更加慘嘅係，連大行都唔再睇好佢喇。大和就喺眾安績後，將評級由「持有」下調至「跑贏大市」，仲將「他屐」大降至６０蚊，仲表示保費高速增長係非常重要，如果唔係好難取得規模效益。眾安未來嘅業務有無改善就未知，不過博客都建議大家唔好等喇，呢幾日不停創新低，加上魚缸無力，都係先止蝕為妙！
《編者按》本欄搜羅即市傳聞，惟消息未經證實，《經濟通》亦不保證內容之準確性。
【你點睇】美眾院通過法案，香港駐美經貿辦恐遭關閉，你是否支持中方對此作出強烈反制？► 立即投票
