RSS訂閱 火雞國（土耳其）經濟危機暫時降溫，但魚缸總係一波未平，一波又起，美金強勢連日搞到港匯有好幾次都觸及７﹒８５弱方兌換保證，「孖屐」又再開始憂慮香江出現走資潮，加上下個禮拜，花旗國就會一連四日舉行聽證會，有可能會通過對神州進口嘅２０００億美金商品徵收一成關稅，喺咁多唔確定嘅因素影響下，魚缸短期內都繼續難有運行。
魚缸早前都有一些利好消息出台，國務院總理李克強喺上個月尾開會嗰陣時釋放出下半年要加大基建投資嘅訊號，有唔少基建鐵路街坊都彈起過一排。事實上，搞基建要唔少建築材料，包括金屬、水泥同塑膠，但神州塑膠一哥聯塑（０２１２８）持續備受冷落，由今年五月中開始一直瀡滑梯。
聯塑主要喺神州製造及銷售塑料管道及管件，由於塑膠管道應用廣泛，無論係水電、通訊同燃氣輸送都用到佢，加上聯塑又同時係行業一哥，喺中央近年大搞通訊同燃氣下，聯塑嘅業績增長都相當穩定，過去五年，收入同利潤都穩定上升，派息金額亦連年增加。另外，神州近排多個地方公布咗，下半年補短板基建重大項目投資計劃，聯塑或可以借勢彈起。
聯塑今年預測市盈率只有４﹒８８倍，估值相當吸引，加上股價由五月高位６﹒２銀不斷向下，以噚日收市價計，已經回吐咗差唔多三成，加上依家有低位喘穩跡象，可以考慮喺現價部署博反彈。
《編者按》本欄搜羅即市傳聞，惟消息未經證實，《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情
